Квез чидани?
Хур вили и нуькI гьашаратар недай къушарикай я: адан емдин асул пай вирт кIватIдай чIижер я. И нуькIрез куьтIкуьруьтI ва я чIижер недай нуькI (пчелоедка) лугьузва.
ШуькIуь, амма са кьадарда яргъи кIуф алай куьтIкуьруьтIар асул гьисабдай Африкадин тропикра яшамиш жезва. ГьакIни абур Европадин кьиблепата, Мадагаскарда, Азияда, Австралияда, ЦIийи Гвинеяда гьалтзава. КуьтIкуьруьтIрин бязи жуьреяр санай масаниз куьч жедайбур я. Пешекаррин гафаралди, чIижерхъанвилиз зиян гузвай и къушарин къизилдин ва къацу рангунин жуьреяр Россиядин мулкарани ава. Бязи маса делиларни ава.
. И къушрал урус чIала «щурка» тIвар акьалтун ада акъудзавай шуьр-шуьр-р сесерихъ галаз алакъалу я.
. КуьтIкуьруьтIриз ялгъузвал кIандач, абур лужаралди яшамиш жеда.
. Абур датIана гьерекатдик ква.
. КуьтIкуьруьтIри тIуьниз анжах гьашаратар ишлемишзава.
. Гьатай чIижер ва маса гьашаратар туькьуьндайла, абуру кIас тавун патал куьтIкуьруьтIди сифте нубатда гъуьрч кIеви чкадал элязава ва кIускIусзава.
. И къушар чимивал кIандайбур я. Эгер +10 градусдилай агъуз гьава аваз хьайитIа, абуру саки лув гудач.
. Мукар и къушари вацIарин къерехра, кIамара туькIуьрда.
. Вич ва шарагар тухарун патал куьтIкуьруьтIди гьар юкъуз 225 гьашарат кьван кьуна кIанзава.
. КуьтIкуьруьтIар тIебиатда 5-6 йисуз яшамиш жезва. Еке куьтIкуьруьтIдин бедендин заланвал 50-56 граммдикай ибарат жеда.
«Лезги газет»
