Квез и шикилдай аквазвайди Оружева Нурият Наримановна я. Ам 2010-йисуз Махачкъалада дидедиз хьана. 2012-йисуз абурун хизан Амурдин областдин Юктали (БАМ) посёлокдиз фена.

Манийрал рикI алай Нурията 3 йис хьайидалай кьулухъ ана кьиле физвай шад мярекатра иштиракиз хьана. 2018-йисуз руш диде-бубадихъ галаз багъри ватандиз хтана. 2020-йисуз Нурият Махачкъаладин Т. Мурадован тIварунихъ галай 5-нумрадин музыкадин школадик эгечIна. Хъсан сес авай руша гзаф конкурсра, фестивалра, мярекатра вичин алакьунар къалурна, адакай дипломрин, грамотайрин ва пишкешрин сагьиб хьана.

2023-йисалай Нурият Кьасумхуьрел яшамиш жезва. Ада Кьасумхуьруьн 2-нумрадин СОШ-да ва Г. Гьасанован тIварунихъ галай музыкадин школадани кIелзава. Нурият фортепианодай ва тар ягъунайни чирвилер къачуз алахънава. Ада районда тухузвай шадвилин саки вири мярекатра вичин алакьунар къалурзава.

2024-йисан майдиз Нурията вичин чIехи диде Эльмира Рамалдановадихъ галаз «Голос семьи» конкурсдани иштиракна. Ада гьакI республикадин дережадин мярекатрани, кьилди къачуртIа, Дербентда «Ватанпересвилин манидин форумда», Махачкъалада «Пианистрин конкурсда» вичин устадвал къалурна. Мартдиз ада, Гъалибвилин 80 йисан юбилейдиз талукьарна, районда кьиле тухвай конкурсда 1-чка кьунва.

Кьуй Нуриятахъ мадни еке агалкьунар хьурай!

Назифа Юркъулиева