Эхиримжи йисара CтIал Сулейманан районда хуьруьн майишатдин хел вилик фенвай чкаяр гзаф хьанва. Абурукай яз Эминхуьруьн тIварни кьаз жеда.
Алатай асирдин 70-80-йисара хуьруьн мулкунал республикада кIвенкIвечи карханайрикай сад тир «Аламишинский» совхоз кардик квай. Ана гьар йисуз 3500-4000 тонн ципицIар кIватI хъийизвай. Гзаф маса майишатар хьиз, «перестройкади» и совхозни чукIурна, ципицIар, техилар, салан майваяр гьасилиз хьайи адан мулкар чIурухъан чкайриз элкъуьрна.
Эхиримжи 18-22 йисан къене хуьруьн мулкарал уьзуьмлухар, багълар кутун хъувуна. Алай вахтунда ина кардик квай хуьруьн майишатдин карханадихъ, лежбервилинни фермервилин майишатрихъ, арендаторрихъ 350 гектардилай виниз уьзуьмлухар ава.
Гатфарин и йикъара уьзуьмлухра рабочийринни механизаторрин къайгъуяр къалин хьанва. Вири майданра тегьенгрин кьурай ва герек авачир хилер атIана, тегьенгрин пунариз пер яна, хайи дестекрин чкайрал цIийибур акIур хъувуна, симер тIарамарна акьалтIарнава. Алай вахтунда тегьенгрин хилер симерал кутIунзава, уьзуьмлухриз гатфарин ятар гузва.
Гатфарин чуьлдин кIвалахар Гьажимет Аллагьвердиеван, Надир Ягьяеван лежбервилинни фермервилин майишатрин, арендаторар тир РД-дин хуьруьн майишатдин лайихлу работник Алимирзе Агъамирзоеван, Миламудин Мегьамедован, Назир Гьамидован, Расим Гьамзатован кIвачихъ галай уьзуьмлухра галай-галайвал ва хъсан ери аваз кьиле физва. А. Агъамирзоеван кIвачихъ 8 гектар уьзуьмлухар гала. Арендатордихъ анин гьар са гектардай алай йисуз 90 центнердилай тIимил тушиз ракъинин кагьрабаяр кIватI хъийидай фикир ава. И кар патал ада уьзуьмлухрихъ хъсан гелкъуьн тешкилнава.
Чпин кIвачихъ галай уьзуьмлухрин гьар са гектардай 100-120 центнер ципицIар кIватI хъийизвай КФХ-яр ва арендаторар ава.
Шадвал кутадай кар ам я хьи, са шумуд касди багълар кутунва, ачух майданра ва теплицайрин майишатра салан майваярни гьасилзава. Хуьруьн зегьметчийрихъ алай йисни хуьруьн гьар са хиле агалкьунар аваз акьалтIардай къаст ава.
Хазран Кьасумов
