Ам гилан Рутул райондин Ихрекрин хуьре дидедиз хьана. Шаир хайи хуьре ва ханарин меркез Илисуда чIехи хьана. Вилер зайиф тирвиляй адаз Буьркьуь Режебни лугьудай. Инсанрин алакъайра гьамиша гьахълувилин терефдар хьуниз килигна, — Гьахъ Режебни.

Шаирди рутул, лезги ва туьрк чIаларал шиирар теснифдай ва абур чуьнгуьрдихъ галаз тамамардай. Чал адан жемиятдин алакъайрикай, яшайишдикай, муьгьуьббатдикай туькIуьрнавай «Инсан ава», «Нагьакьдаз», «Атанани?», «Севдуьгуьм», «КIаниди», «Тагъ илисна зал», «Кьве хал», «Дегишдач» ва маса шиирар агакьнава. Ихрек Режебан чIалар Гь. Гашарова, С. Къурбанова, С. Магьмудовади кIватI хъувуна. 2012-йисуз урус чIалал адан эсерар гьатнавай «Куьр Режеб — рутул, лезги ва азербайжан поэзиядин классик» ктаб акъатна. Адан эсерар лезги чIалаз А. Саидовани А. Мирзебегова элкъуьрна.

«Лезги газетдин» 2025-йисан 13-нумрадай.