Эхиримжи йисара райондин картадал цIийи хуьрер арадал атанва. Абурукай сад ЦIийи Мамрач я — райондин 39 хуьруькай виридалайни «жегьилди». Хуьруьн агьалийрин сходдин, жемятдин тешкилатрин, райондин депутатрин собранидин тIалабунриз килигна, 2015-йисуз Дагъустан Республикадин Халкьдин Собраниди ЦIийи Мамрач хуьр регистрация авуна. Ам Герейханован хуьруьн администрациядик акатзава.
ЦIийи Мамрач «Кавказ» федеральный шегьредин къерех тирвал, Гуьлгери вацIун чапла пата, Мегьарамдхуьруьз ва Кьасумхуьрел физвай рекьер чара жезвай чкадал (Советский хуьруьн патав) ала. Шегьредилай Кьасумхуьр галай патахъ элкъвезвай къекъуьндал, ЦIийи Мамрач хуьруьк ккIана, Дагъустандин халкьдин шаир СтIал Сулейманан парк-аллея ала. Алай вахтунда цIийикIа туькIуьр хъувунин кIвалахар кьиле физвай и объектдилай чун цIийи хуьруьхъ, адан агьалийрихъ, социальный рекьяй тухванвай кIвалахрихъ ва вилик акъвазнавай везифайрихъ галазни таниш жез эгечIна.
Яшдиз килигайла, гьеле «жаван» хуьре хейлин кIвалахар кьиле тухванва. Хъипи шир янавай газдин турбайри ва экверин линийри, хирхем вегьена, къайдадиз гъанвай куьчейри, пландин бинедаллаз эцигнавай, къавариз ракьни шифер янавай, пластикдин дакIарар квай кьве мертебадин кIвалери, абурухъ галай багъларини салари гуьгьуьлар шадарзава.
ЦIийи Мамрач хуьре чал райондин «ЖКХ и благоустройство» МКУ-дин директордин везифаяр вахтуналди тамамарзавай Икрам Нежведилов ва Герейханован хуьруьн администрациядин кьил Руслан Алдыровни гьалтна. Абуру хуьруьнвийрихъ галаз тамамарнавай ва хъувуна кIанзавай кIвалахар веревирдзавай, агьалийрин дерди-бала хабар кьазвай.
Руслан Алдырова чаз лагьайвал, са шумуд йисан вилик куьгьне Мамрачрин хуьр алай чкадал ва адан патарив гвай мулкарал инсанри яшайишдин кIвалер эцигиз башламишна, нетижада анал хейлин кIвалер авай цIийи хуьр арадал атана. Гьеле 1994-йисуз ина яшайишдин кIвалер эцигун патал чилин 470 участок чара авуна.
— Алай вахтунда хуьре 465 майишат ава, 600-далай виниз агьалияр яшамиш жезва, — давамарзава ихтилат Руслан Алдырова. — Хуьре 13 куьче арадал атанва, чIехи пай куьчеяр хирхем вегьена, дуьзарнава.
Малум хьайивал, 2019-2020-йисара вири куьчейра газдин ва экверин линияр тухвана.
Икрам Нежведилова чаз лагьайвал, вилик йисара хуьре гзаф инсанри экверин линияр чпи чпиз, какатайвал, тухвана. Алай вахтунда абур проектдин бинедаллаз тухунин кIвалахар кьиле физва. Санлай хуьре 200-дав агакьна цIийи симинин даяхар акIурун лазим я. Икьван чIавалди цIийи 42 даях акIурнава, и кIвалах давамарзава. Хуьруьнвияр атIунар авачиз эквералди таъминарунин мураддалди цIийи 3 трансформатор эцигнава.
— ЦIийи Мамрач хуьр энергиядалди таъминарунин къурулуш вилик тухунин месэла лап важиблуди я, — лугьузва Икрам Нежведилова. — И месэла веревирд авун патал райадминистрациядин кьилин 1-заместитель Заур Къагьриманов «Россети Северный Кавказ» ПАО-дин филиалдин директордин везифаяр вахтуналди тамамарзавай Арсен Гьажиевахъ галаз гуьруьшмиш хьана. И месэла гьялда, мумкинвилер авазва.
Живни марф къвазвай, мекьи югъ тиртIани, лугьудайвал, ЦIийи Мамрачрин куьчейрик инсанар квай. Агьалияр чи патав атана, чаз хуьруькай, чпин къайгъуйрикай ихтилатар авуна.
— Зи бине Татарханрин хуьряй ятIани, эхиримжи йисара зун тIебиатдин гуьзел чкадал алай ЦIийи Мамрач хуьре яшамиш жезва, — лагьана Алибала Гьажибалаева. — Хуьр арадал атана гзаф йисар туштIани, ам къвердавай чIехи, агьалийрин яшайиш хъсан жезва. Чи цIийи хуьруьз райондин кьил Саид Темирханов, къуллугърин кьиле авай ксар, пешекарар мукьвал-мукьвал къвезва, агьалийрин дерди-гьал, къайгъуяр чирзава, абур кьилиз акъуддай серенжемар кьабулзава.
Малум хьайивал, Алибала Мирзебалаевичан кьве гадади Донбассда дяведин махсус серенжемда иштиракзава.
— Отпускдиз хуьруьз хтайла, зи гадаяр Саид Мусиновича вичин кабинетда кьабулна, абурун дерди-гьал хабар кьуна, — давамарна Алибала Гьажибалаева. — Чи хизан яшамиш жезвай куьче, хирхем вегьена, къайдадиз гъанва, куьчеда газни ава, эквни.
ЦIийи хуьруьхъ, адан агьалийрихъ къайгъуярни, авуна кIанзавай крар-кIвалахарни жедайди я. Райондин кьиле авай ксар ва хуьруьн администрация ЦIийи Мамрачрин хуьре школадин, аялрин бахчадин, фельдшервилинни акушервилин пунктунин, клубдин ва яшайишдинни культурадин маса объектар эцигунин къайгъуйра ава. АСП-дин кьил Руслан Алдырова лагьайвал, школа эцигун патал 1 гектар ва ФАП эцигун патал 7 сотых чилин участокар чара авунва.
Чун ЦIийи Мамрачрин хуьряй, ам йисалай-суз яшайишдин рекьяй вилик фидайдахъ инанмишвал аваз, экъечIна. ИкI жедайдахъ мамрачвияр чебни инанмиш я.
Хазран Кьасумов
