«ГъвечIи ва юкьван карчивал» милли проектдин куьмекдалди Дагъустандин хуьруьн майишатда гъвечIи ва юкьван карчивилин (МСП) 200-далай гзаф карханайри кIвалах башламишнава, 260-далай гзафбурув государстводин патай куьмек агакьнава, хабар гузва РД-дин хуьруьн майишатдин ва недай суьрсетдин министерстводин информациядин центради.
2019-2020-йисара, региондин «Фермерриз куьмек гунин къурулуш туькIуьрун ва хуьрерин кооперация вилик тухун» проектдин сергьятра аваз МСП-дин 87 субъектдиз грантрин куьмек гана, хуьруьн майишатдин 21 потребкооперативдив субсидияр агакьна, кIвалахдин цIийи 152 чка арадал гъана.
Малум хьайивал, РД-дин хуьруьн майишатдин ва недай суьрсетдин министерстводи региондин «ГъвечIи ва юкьван карчивилин субъектар тади гьалда чIехи авун» проектдин цIийи редакциядик квай мярекатра иштиракунин нетижада 154 фермердив ва хуьруьн майишатдин кооперативдив финансрин куьмек агакьна.
ГьакIни, малум хьайивал, 2024-йисан нетижайралди Дагъустандин гъвечIи ва юкьван карчивилин карханайриз, санлай къачурла, 308 миллион манат тешкилзавай 114 микрозайм чара авунва.
РД-дин карчивилин ва инвестицийрин агентстводи гъавурда турвал, финансрин рекьяй куьмекдиз талукь яз, санлай къачурла, 80-далай гзаф арзаяр атана. Идалайни гъейри, Микрофинансрин ва лизингдин фондуни, санлай къачурла, 485 миллион манатдин къимет авай техника маса къачуниз талукь тир (лизингдин) 75 миллион икьрар кутIуннава.
Заминвилин фондуни карчивилин 63 карханадиз, санлай къачурла, 375 миллион манатдин заминвилин чарар ганва, желбнавай кредитрин кьадар 711 миллиондилай гзаф я.
Амина Муслимова
