И мукьвара РД-дин милли сиясатдин ва динрин крарин рекьяй министерствода «Алатай, гилан ва гележегдин алакъаяр» темадай элкъвей стол тешкилнавай. Ана гьукумдин органрин векилри, дяведин ва зегьметдин ветеранри, «афгъанвийри», СВО-дин иштиракчийри ва жаванри иштиракна. Абуру акьалтзавай несил ватанпересвилин руьгьдаллаз тербияламишунин карда государстводин ва жемиятдин вилик акъвазнавай важиблу везифайрикай веревирдер авуна. Иллаки тарихдин вакъиаяр, тарсар рикIел хуьнин месэладиз кьилин фикир гана.
РД-дин милли сиясатдин ва динрин крарин рекьяй министр Энрик Муслимова ватанпересвилихъ халкьар сад авунин, абурун арада авай стхавилин алакъаяр мягькемарунин ва милли хатасузвал хуьнин карда еке къуват авайди къейдна.
— Чна цIи ЧIехи Гъалибвилин 80 йисан юбилей къейдда,- лагьана Э. Муслимова. — Заз инанмишвал ийиз кIанзава хьи, дяведин махсус серенжемдани чна цIи гъалибвал къазанмишда. Россияди садрани дявеяр башламишайди туш, амма дявеяр куьтягьун гьамиша адан хиве гьатна.
ЧIехи гъалибвал чи гьар са агьали патал дамахдай кар я. Яру Армиядин кьушунри неинки чи шегьерар, хуьрер, гьакI вири Европани фашизмдикай азадна. Къе абур маса чIалал рахазватIани, РагъакIидай патан чIехи пай жегьилар Дуьньядин кьвед лагьай дяведа гъалибвал Америкади къачуна лугьудай фикирдал гъанватIани, тарихдин вакъиаяр садавайни инкариз, дегишариз жедач, — малумарна Э. Муслимова.
Мярекатдал РД-дин Кьилин къвалав гвай агъсакъалрин советдин председатель Ибрагьим Ибрагьимов, Общественный палатадин жемиятдин хатасузвилин, ветеранрин крарин, военныйрин, абурун хизанрин къайгъу чIугунин рекьяй комитетдин председателдин заместитель Мегьамед Арипов, Вирироссиядин ветеранрин жемиятдин «Женгинин стхавал» тешкилатдин Дагъустандин отделенидин председатель Мусашейх Салманов рахана.
Чи мухбир
