Республикада, Гъалибвилин 80 йисан юбилейдин сергьятра аваз, жуьреба-жуьре мярекатар тешкилзава. Алатай гьафтеда Дагъустан Республикадин Гьукуматдин Председателдин заместитель Муслим Телякавован регьбервилик кваз тешкиллувилин «Гъалибвал» комитетдин гегьенш заседание кьиле фена. Ана гьукумдин ва чкадин самоуправленидин органрин кьилери, жемиятдин ва мергьяматлувилин идарайрин векилри иштиракна.

Мярекатдал Гъалибвилин 80 йисан юбилейдиз ва Ватан хуьзвайбурун йисаз бахшна тухудай мярекатрин, серенжемрин пландиз килигна­. Гьа са вахтунда Махачкъаладин ас­керрин сурарин мемориал цIийикIа туькIуьр хъувуниз, республикада «Гъа­либвилин пайдах» серенжем тухуниз талукь месэлаярни веревирдна.

— Ватанпересвилин тербиядин вишералди мярекатар, образованидин программаяр, Ватандин ЧIехи дяведин ветеранрихъ, далу патан зегьметчийрихъ галаз гуьруьшар вини дережада аваз тешкилна ва кьиле тухвана кIанда,- лагьана М. Телякавова.- И кардал Дагъустан Республикадин Кьил Сергей Меликова датIана гуьзчивалда.

Суваррин лап кьилин мярекатрик акатзава: военный техникадин парад, «Рекьин тийир полк», «Гъалибвилин Пайдах», «РикIел хуьнин шем», «РикIел хуьнин вахта», «Ватандин Игитрин вахта» акцияр, республикадин край чирдайбурун-геле къекъведайбурун слет, «Россия чи кIвал я. Гъалибвал чаз виридаз авай сад я» автопробег, цIийиз туькIуьр хъувунвай, В. Макаровадин тIварунихъ галай Женгинин баркалладин музей шад гьалара ачухун…

РД-дин жегьилрин крарин рекьяй министр Камил Саидова лагьайвал, къейд авунвай вири мярекатра жегьилрин иштираквал екеди жеда. Ада рикIел хкайвал, алатай йисуз республикада Ватандин Игитрин юкъуз, Гъалибвилин 80 йисан юбилейдихъ галаз алакъалу яз, международный волонтеррин республикадин корпус ачухнай. Ам республикадин жегьилрин центрадин базадал тешкилнава. Адан кар алай везифа республикадин вири мулкуна Гъилибвилин юбилейдиз талукьарнавай мярекатра иштиракун, тешкилатчийриз вири рекьерай куьмек гун я.

Гъалибвилин сувариз талукь яз РД-дин культурадин министерстводи тешкилзавай мярекатарни итижлубур, метлеблубур я. Министр Зарема Бутаевади малумарайвал, театррин, концертрин залра, музейрин дараматра, методикадин центрайра, кIелдай ва культурадин идарайра 80-далай виниз серенжемар тухуда.

Абурукай сад февралдиз кардик кутунвай «Гъалибвилин 80 чин» серенжем я. Кьудкьад юкъуз Дагъустандин А. Тахо-Годидин тIварунихъ галай милли музейдин сайтда ва социальный сетра музейдин фондуна авай Ватандин ЧIехи дяведиз талукь материалар эцигда ва къалурда­.

Суварин вилик квай йикъара меркезда «ЧIехи Гъалибвилин 80 суьрет» выставкади кIвалахда. 9-майдиз Буйнакскдин кьилин майдандал Женгинин баркалладин музейдай къачунвай шикилрин «Ватандин ЧIехи дяведин 80 шикил» выставка ачухда.

Дагъустандин государстводин ни­нийрин театрдин вилик 9-Майдиз «Гъалибвилин 80 шем» акция кьиле­ фида. КуькIвенвай шемерикай артистри «80» рекъем арадал гъида ва Ватандин ЧIехи дяведикай, 80 йисан­ юбилейдиз бахшнавай шиирар кIелда.

Абад Азадов