Алатай вацран эхирра Махачкъалада РД-дин Гьукуматдин Председателдин заместитель Нариман Абдулмуталибован регьбервилик кваз къанунсуздаказ тамар атIунин вилик пад кьунин жигьетдай кардик квай комиссиядин заседание кьиле фена. Ана РД-дин тамарин майишатдин Комитетдин председатель Вагьаб Абдулгьамидова, МВД-дин ва са жерге маса идарайрин векилри иштиракна.
Заседанидал асул месэла веревирд ийидалди вилик Н.Абдулмуталибова алай вахтунда республикадин мулкара авай тамара цIаяр кьур дуьшуьшар арадал татун патал кьабулзавай серенжемриз талукьарнавай докладдихъ яб акална. В.Абдулгьамидова къейд авурвал, цIаяр кьунин хаталувал, санлай къачурла, 13 лесничествода ава. Анра бедбахтвилин дуьшуьшар арадал татун патал са кьадар кIвалахар кьиле тухванва. Кьилди къачуртIа, Къарабудахкентдин, Самурдин, Ботлихдин, Кьасумхуьруьн ва са жерге маса лесничествойрин тамухъанри планда къалурнавай кIвалахар хъсан ери аваз ва вахтунда тамамарзава.
Докладдихъ яб акалайдалай кьулухъ Н.Абдулмуталибова тамар цIаяр кьуникай хуьн важиблу месэла тирди ва ам датIана кьетIен гуьзчивилик кутун герек тирди къейдна.
Къанунсуздаказ тамар атIузвай дуьшуьшрин вилик пад кьунин жигьетдай кьиле тухузвай кIвалахдикай гегьеншдиз Рослесхоздин векил Ренат Мегьамедова ихтилатна. Адан гафаралди, са шумуд йис идалай вилик авай рекъемрив гекъигайтIа, къенин юкъуз тамарин инспекторрин ва абуру лесничествойра кьиле тухузвай мярекатрин кьадар хейлин артух хьанва. И карди санлай тамар хуьниз хъсан патахъай таъсирнава. Мисал яз, алатай йисуз Дагъустандин тамарин мулкара инспекторри 18564 ахтармишун тешкилна ва тамариз талукь къанунар чIурнавай 227 дуьшуьш винел акъудна. Абурукай 37 дуьшуьшда ихтияр авачиз там атIанва.
Р. Мегьамедова къейд авурвал, къанунсуздаказ там атIанвай 25 дуьшуьшда материалар къанун-къайда хуьдай органриз рекье туна. 13 дуьшуьшда уголовный делояр къарагъарна, 6 кас жавабдарвилиз чIугуна.
Заседанидин нетижаяр кьадайла Н. Абдулмуталибова къейд авурвал, районра там атIузвай дуьшуьшрин вилик пад кьунин жигьетдай кьиле тухузвай кIвалах мадни йигинарун герек я. Ада гьакIни Махачкъаладин тIебиат хуьнин месэлайрал машгъул жезвай прокуратурадин векилриз гуьзчивал тухунин жигьетдай кьабулзавай серенжемар артухарун теклифна.
Заседанидин кIвалахдикай гегьеншдиз РД-дин Гьукуматдин сайтдай кIелиз жеда.
Чи мухбир
