Махачкъала шегьерда 25-мартдин экуьнахъ, сятдин 9 жез 20 декьикьа амайла, Гъепцегьрин куьчеда гзаф мертебайрин кIвалера, газ себеб яз, хъиткьинун арадал атана. Са шумуд кас больницадиз аватна. Хейлин вахт алатайла, шегьердин Шамилан тIварунихъ галай куьчедани телефонар маса гузвай туьквен хъиткьинна. Кьуд касдиз хасаратвал гана.
И агьвалатар хьайидалай гуьгъуьниз са акьван вахт алатнач, Гъепцегьрин куьчедиз Дагъустан Республикадин Кьил Сергей Меликов атана. Ада инсанар къутармишай пешекаррихъ ва кIвалин агьалийрихъ галаз суьгьбетар авуна. Хъиткьиннавай кIвалериз килигна. Жавабдарвал хиве авай къурулушриз талукь тапшуругъар, гьакI журналистрин суалризни жавабар гана.
Республикадин регьберди лагьайвал, гзаф мертебайрин кIвалериз ва патарив гвай дараматриз хейлин зиянар ганва. КIвалерай куьчарзавай инсанар вахтуналди ацукьардай чкаяр жагъурзава. Зиянар хьайи виридав герек куьмек агакьда. Пешекарри ахтармишунар авурдалай гуьгъуьниз ва зиянрин кьадарар тайинарайла, агьалийриз гудай куьмекдин кьадарарни тайинарда.
Гзаф мертебайрин кIвал бязи къайдайрал амал тавуна ишлемишзавай. Дарамат эцигайбуру проектда къалурнавай 9 ваъ, 17 мертеба хкажна. КIвалерин агьалияр газдалди таъминарунин месэлани чпи гьялуниз мажбур хьана.
Яшайишдин кIвалер талукь коммуникацийрик техникадин рекьяй хатасузвилин нормайрал амал авуна ва пешекаррихъ галаз санал кутуна кIанзавайди я. Газдиз талукь тадаракар учетдизни къачудайвал. Гьайиф хьи, талукь ксари и къайдайрал амалнач.
Алатай йисара республикадин шегьерра, законрал амал тийиз, гзаф мертебайрин хейлин кIвалер ишлемишиз вахкана. Абура агьалияр яшамиш жезва. Республикадин Гьукуматди законсуз эцигнавай кIвалерай инсанар акъудзавач, я кIвалерни чукIурзавач. Абур хатасуз авун патал герек вири серенжемар кьабулзава.
«Сад тир Аллагьди чаз куьмекзава. Кьилинди ам я хьи, хъиткьинуникди инсанар, аялар телеф хьанач», — лагьана Сергей Меликова, журналистрин суалриз жавабар гудайла.
Гьа и юкъуз Сергей Меликован тапшуругъдалди РД-дин Гьукуматдин Председатель Абдулмуслим Абдулмуслимова Махачкъаладин Администрацияда махсус комиссиядин заседание кьиле тухвана. Арадал атанвай гьалариз килигун ва къимет гун патал заседанидиз талукь вири ведомствойрин, идарайрин, гуьзчивалдай органрин пешекарриз теклифнавай.
Газ хъиткьинуникай
Газ хъиткьинай кIвалери цIайни кьуна. ЦIаяр хкадардайбур гъиле-гъил аваз атана ва абуру цIай хкадарна. Авай делилралди, 4 квартирадиз зиянар хьанва. Къваларив гвай кIвалерин дараматрин дакIаррин шуьшеяр ханва. Гьаятда авай автомашинризни зиянар ганва. КIвалерай 150 кас куьчарнава. ЧIуру гьалар арадай акъудун патал 86 касди ва 24 техникади кIвалахна.
Алакъадин салондикай
Имам Шамилан куьчеда хъиткьинай алакъадин салондини цIай кьуна. Дараматдин са пад чкIана. Ина 25 пешекарди ва 7 техникади кIвалахна. Дарамат газдин сетрик кутунвайди тушир.
Эхиримжи делилралди, гзаф мертебайрин кIвалерай 4 касдиз хасаратвал хьана. Пуд дишегьли (сад лап кIевел ала) ва са итим больницада къаткурнава. Хъиткьинуникди хасаратвал хьайи 4 кас республикадин клиникадин больницадиз тухванва. Вири яшар хьанвай инсанар я. Духтуррин гафаралди, 3 кас четин гьалда ава. Абуруз герек вири куьмекар гузва.
Кьве чкадани арадал атанвай гьаларихъ галаз алакъалу яз, уголовный делояр къарагъарнава. Прокуратуради талукь тир ахтармишунар кьиле тухузва. Къутармишдайбуру гъиле-гъил аваз 300 квартира ахтармишнава.
Хийир Эмиров
