25-мартдиз РД-дин Кьил Сергей Меликова ЦУР-дин цIийи регьбердихъ галаз гуьруьш кьиле тухвана. Къейд ийин хьи, и къуллугъдал журналист, «Дагес­танская правда» газетдин кьилин редактордин заместитель Исрафил Исрафилов тайинарнава.

Гуьруьшдал С.Меликова И. Исрафиловаз кIвалахда еке агалкьунар хьун алхишна ва дагъустанвийрин месэлаяр гьялунин карда ЦУР-дихъ еке метлеб авайди къейдна. Тек са алатай йисуз и идаради агьалийрилай атанвай 100 агъзурдав агакьна арзаяр кьабулна, къарагъар­навай месэлаяр гьялун патал абур талукь министерствойризни идарайриз рекье ­туна.

Республикадин Кьилин фикирдалди, ЦУР-ди агьалийринни гьукумдин органрин арада авай ал­а­къа­яр мягькемару­нин карда кьетIен чка кьазва. Ада цIийи регьбердиз и жигьетдай кьиле тухузвай кIвалахдиз асул фикир гун ва сифте чкадал Дагъус­тандин халкьдиз куь­мекунин­ везифа эцигун тек­лифна.

ЦУР-дин виликан регьбер Ислам Мусаева гила РД-дин Кьилин къенепатан сиясатдин ва чкадин самоуправленидин Управленидин начальникдин заместитель яз кIвалахда.

Чи мухбир