Мергьяматлувилин «Леки» фондуни Кьиблепатан Дагъустанда образованидин хел вилик тухун патал жуьреба-жуьре мярекатар тешкилзава, серенжемар кьабулзава. Мукьвара фондуни Ахцегь, Докъузпара, Мегьарамдхуьруьн, СтIал Сулейманан, Кьурагь районрин мектебривни аялрин бахчайрив лезги чIалал акъуднавай ктабар агакьарна.
«Лезги газетдин» редакциядиз фондунин векилри хабар гайивал, санлай къачурла, ктабар маса къачуниз 155 агъзур манат пул харжна. Абурун арада Дагъустандин халкьдин шаир П. Фатуллаевадин ва «Лезги газетдин» кьилин редактор М. Ибрагьимованни адан заместитель К. Ферзалиеван ктабар ава.
Эхиримжи йисара иллаки аялрин бахчайра бицIекар патал лезги чIалал акъуднавай ктабрин кьитвал авайдакай чаз хабар авай. Гила «Леки» фондуни кьиле тухвай серенжемдин куьмекдалди и месэла са жуьреда кьванни гьялнава лагьайтIа жеда.
Чи мухбир
