Зизик хуьруьн тIварцIиз талукь тир баян гуз хьанвач. Хуьр арадал атай вахтни малум туш. Зизиквияр малдарвилел, лежбервилел, кьилди къачуртIа, гьажибугъдаяр гьасилунал машгъул тир. И чили гьажибугъдайрин хъсан бегьерар гузва. Дяведин четин йисара гьажибугъда себеб яз неинки Зизик хуьруьн, гьакI анин патарив гвай СтIал Сулейманан, Табасаран, Хив районрин хуьрерин агьалиярни кашакай хуьдай мумкинвал хьана.

Зизик хуьре Къемкьерар, Гаргарар, Ченехьар, Кьакьалар, Эпитар ва Гамбуяр тухумар ава.

1886-йисан переписдин делилралди, хуьре 102 майишат ва 494 инсан (244 итим ва 250 дишегьли) авай. 1957-йисуз зизиквияр куьгьне хуьруьн патав гвай цIийи чкадиз куьч хьана.

Алай вахтунда хуьре 349 кIвал ава, 1200 кьван агьалияр яшамиш жезва. Хуьр КIварчагъ хуьруьн администрациядик акатзава.

Мурад Мегьамедкеримован «СтIал Сулейманан район: ­тарихдин гелерай» ктабдай