И йикъара Россиядин Федерациядин Советдин Председателдин Сад лагьай заместитель Владимир Якушев Дагъустан Республикадин Кьил Сергей Меликовахъ галаз гуьруьшмиш хьана. Абуру «Сад тир Россиядин» халкьдин программайрик акатзавай сечкийриз гьазурвал акунин, фронтдиз ва СВО-дин иштиракчийриз, абурун хизанриз куьмек гунин месэлаяр веревирдна.
Сергей Меликова къейд авурвал, республикада образованидин инфраструктура эцигуниз еке фикир гузва. «Сад тир Россиядин» халкьдин программадин сергьятра аваз алай йисуз 10 школа бинедилай ремонтда. Идалай гъейри, кьве бахча ва са колледжни цIийикIа туькIуьр хъийида. ГьакIни 2 школадин, 6 бахчадин дараматар эцигда. Гьа са вахтунда аялрин сагъламвал мягькемардай идараярни арадал гъида.
«Сад тир Россиядин» кьилин хилерикай сад дяведин махсус серенжемдиз куьмек гун я. И серенжем эгечIай сифте йикъалай регионди фронтдиз 25 агъзур тонндилай виниз шейэр рекье туна. Абурук техникадин алатар, транспорт, недай суьрсет, алукIдай парталар, сифте нубатда герек къвезвай шейэр квай.
Сергей Меликова гьакIни хабар гайивал, гъилевай йисуз регионда муниципальный сечкияр, идахъ галаз алакъалу яз 6 шегьерда ва 38 районда 607 кампания кьиле фида. Мандатрин кьадар 5997-даз барабар я.
«Лезги газет»
