Бутхуьр арадал атуникай агъсакъалри ихтилатзавайвал, са девирда и чилел вад стха атана — Бут, Бабут, Зугьраб, Ших, Хтун — ва абуру берекатлу, мублагь чилерал вад хуьр арадал гъун кьетIна.

А чIавалай инихъ районда винидихъ къейднавай тIварар алай хуьрер пайда хьана, гьа жергедай яз, – Бутхуьрни. И хуьр арадал атай вахт якъиндиз малум туш. Амма Бутхуьруьн къадимлувилин гьакъиндай бязи сур девирдин затIари шагьидвалзава.

1886-йисан переписдин делилралди, хуьре 64 кIвал авай, ана 305 (150 итим ва 155 дишегьли) кас яшамиш жезвай. Чи йикъара и хуьре 44 кIвал ва 130-далай виниз агьалияр ава. Бутхуьр Шихидхуьруьн администрациядик акатзава.

Бутхуьруьн мукьув гвай чилер цадайла, и хуьруьн мулкарикай чепедин гичинар ва маса затIар жагъана. Хуьруьн кефердинни рагъакIидай патан къерехда, рагъакIидай патан тепедал, археологиядин памятник — Сенгер хуьр — ала. Бутхуьруьн кьибле патан къерехда, тепедал, дин патал чан гайибуруз талукь архитектурадин памятник — «Шагьидрин пIир» — ала.

Хуьре Ахцегьар, Мегьребар, Ярдумар, ЦIергъуьяр, Шамлуяр тIварар алай тухумар ава.

Мурад Мегьамедкеримован «СтIал Сулейманан район: ­тарихдин гелерай» ктабдай.