Мукьвара РД-дин Кьил Сергей Меликован куьмекчи Агьмед Абдуразакьов Ахцегь райондиз мугьман хьанвай. Ада Къурукал хуьруьн мектебда муаллимрихъни аялрихъ галаз кьиле фейи гуьруьшда иштиракна. Мярекатдиз атанвай мугьманрин арада гьакIни муниципалитетдин кьилин заместитель Роберт Гьамзаев, военком Аким Ибрагьимов, Украинада кьиле физвай махсус серенжемдин иштиракчияр тир Шихмурад Абдуллаев, Абдулжалил Эфендиев ва масабур авай.
Асул гьисабдай гуьруьшдал акьалтзавай несилриз ватанпересвилин тербия гунин месэлаяр веревирдна. А. Абдуразакьова муниципалитетдин кьил А.-К. Палчаевазни мектебдин директор Р. Гуьлметовадиз районда, Къурукал хуьруьн мектебда аялрик, жегьилрик ватанпересвилин руьгь кутун патал кьиле тухузвай кIвалахдай, «Посылка от матери» серенжемда иштиракунай сагърай лагьана.
ГьакIни А. Абдуразакьова дагъустанвийри, гьа жергедай яз Ахцегь райондин агьалийрини, Украинада кьиле физвай махсус серенжемда къалурзавай кьегьалвилерикай суьгьбетна. «Чи уьлкведиз алай вахтунда ва идалай кьулухъни халис ватанпересар герек я. Жегьилриз тербия гунин карда и месэладиз кьетIен фикир гун лазим я. СВО-да иштиракуналди чIехи бубайрин баркаллу крар давамарзавай чи йикъарин къагьриманрин дирибашвилер гьакъикъи ватанпересвилин чешнеяр я», — къейдна ада.
Р. Гьамзаева Ахцегь райондиз мугьман хьунай А. Абдуразакьоваз муниципалитетдин кьил А.-К. Палчаеван патай сагърай лагьана ва районда акьалтзавай несил ватанпересвилин руьгьдаллаз тербияламишунин рекьяй кьиле тухузвай кIвалахдикай гегьеншдиз ихтилатна.
Веревирдзавай месэлайрикай чпин фикирар маса юлдашрини лагьана. Гуьруьш мугьманриз савкьатар гуналди ва шикилар ягъуналди акьалтIна.
Агьмед Магьмудов
