РФ-дин оборонадин министерстводин приказдалди, Дагъустан Республикадин военный комиссар яз Абдурагьман Мурадханов тайи­нарнава. Идакай РД-дин Кьил Сергей Меликова вичин телеграм-каналда хабар гана.

Сергей Меликова къейд авурвал, цIийи военкомдихъ хъсан тежриба ава, ада фадлай уьл­кведин Яракьлу къуват­рин органра къуллугъзава. Жуьреба-жуьре йисара кIвалахдин рекьяй къалурнавай викIегь­вил­ерай адаз шабагьарни ганва.

Республикадин Кьилин гафаралди, военный комиссаррин хиве акьалтIай жавабдар везифаяр ава. Мисал яз, армиядин жергейриз эвер гун (призыв) тешкилун, воинский учет тухун ва икI мад. И месэлаярни уьл­кве­дин Яракьлу къуват­рин дурумлувилихъ галаз сих алакъада ава.

«Са акьван секин тушир алай девирда военкоматри жемиятда кьазвай чка иллаки важиблуди я. ГьикI лагьайтIа, военкоматди ва ана зегьмет чIугвазвайбуру жегьилар армиядин жергейра къуллугъ авуниз гьазурзава. Ватан хуьнин игьтияж авай дуьшуьшрани герек вири крар сифте нубатда военкоматди кьилиз акъудзава», — лагьана С.Меликова.

Къейд ийин хьи, Абдурагьман Мурадханован бине СтIал Сулейманан райондин Гачалхуьряй я.

Агьмед Магьмудов