Дагъусанда сар гьасилзавайбуру Белоруссиядиз сад лагьай сеферда яз 300 тонн сар рекье твадайвал я. РД-дин Гьукуматдин пресс-къуллугъди хабар гузвайвал, талукь икьрар Белоруссиядин гъалар гьазурзавай карханадихъ галаз кутIуннава.
Къейд ийин, идалай вилик, 26-28-февралдиз, Дагъустандин Гьукуматдин Председатель Абдулмуслим Абдулмуслимов кьиле авай десте кIвалахдин рекьяй Белоруссияда хьанай. Кьилди къачуртIа, абур уьлкведин са жерге карханайрин кIвалахрихъ галаз таниш хьанай ва сада-садахъ галаз алакъалувилелди кIвалахунин месэлаяр веревирднай.
«Парчаяр гьазурунин хиле Белоруссиядин чIехиди тир ОАО «Полесье» карханадиз мугьман хьунин нетижада Дагъустандай чуьхвенвай ва я эвянавай сар тIвар кьунвай карханадиз ракъурунин меслятдал атана. Сарикай ана гъалар гьазурда», — лагьанва малуматда.
Виликамаз малумарнавай делилралди, гьелелиг чи республикадай 350 тонн сар агакьардайвал я. Идалайни гъейри, гележегда Белоруссиядин гамарин заводризни Дагъустандай сар ракъурдай меслятдал атанва.
«Лезги газет»
