«Лезги газетдин» алай йисан 6-нумрадай Пери Сабировадин «Гудайла, къачу…» макъала кIелайла, рагьметлу бубади (дахди) ахъаяй са агьвалат зи рикIелни хтана. Дяведилай гуьгъуьнин дар йисар тир. Дах са шегьердиз командировкадиз фейила, адан патав тIалабзавай са аял атана. Дахдиз ам язух атана, къачуна адаз тIунутI, са тIимил пулни гана.
Кьисметар я инсанрин. Са гзаф йисар алатайла, дах мад гьа шегьердиз акъат хъувуна. Ам акурла, са жегьилди, салам гана, адавай жузун-качузун авуна. Ахпа патав гвай столовойдиз теклифна. Дахди вичик тIимил кичIни акатналдай. «Им вуж хьуй икьван заз гьуьрметзавайди? Бандит яз хьайитIа, зун идан гъиляй гьиниз фида?» — фикирни атаналда кьилиз. Ваъ, амалар бандитдинбур туш. Хъсан тIуьн-хъун гана. Чинни ачух я. Идалай башкъа, жегьилди, акъудна, са кьадар пулни вугана дахдив.
— Заз ви пул герек туш, чан хва. Заз икьван галайвилер ийизвай вун вуж я? — хабар кьуна дахди.
— Зун, чан халу, ви рикIел аламач. Вуна са шумуд йис идалай вилик са аялдиз тIунутIни пул ганай. Зун гьа гада я. Зун гила бизнесдал машгъул жезва. Вуна авур хъсанвал за рикIелай алуднавайди туш. Чун икI сад-садал дуьшуьш хъхьунал зун гзаф кьадар шад я, — жаваб хгана жегьилди.
— Ваз зун гьикI чир хъхьана, чан халудин? — мадни хабар хкьуналда дахди вичи.
— Халу, зун а чIавуз датIана ви чинал алай гелез килигзавай. Гьа гелелди заз вун чир хъхьана.
Эхь, ихьтин инсанарни ава чи арайра: садра авур хъсанвал уьмуьрда рикIелай алуд тийидай. Аллагьди хуьй чеб! Чахъ мисал ава: «Хъсанвал авуна, гьуьлуьз вегь, гьанайни ам акъат хъийида».
М. Майрам
