Лутуйрин зенгер

Лутуяр, агьалийриз зенгер ийиз, чеб МФЦ-дин къуллугъчияр я лугьуз, абурухъ галаз таниш жезва ва, жуьреба-жуьре кьуьруькрикай менфят къачуз, абур алцурариз алахъзава.

Дагъустандин МФЦ-дин малуматда хабар гузвайвал, эхиримжи вахтара лутуйри, зенгер ийиз, чеб госкъуллугъчияр, МФЦ-дин пешекар хьизни «танишвал» гузвай дуьшуьшар пайда хьанва. ЧIуру къастар авайбурун макьсад агьалийрин хсуси делилар чпин гъиле гьатун я. И фенд кьилиз акъудун патал гьар жуьредин багьнаяр туькIуьрзава: гуя чпи зенгнавай агьалидин «Госкъуллугърин аккаунт» кардикай хкатнава, делилар масабурун гъиле гьатунин хаталувал ава, агьалидин тIварцIел кредит къачунва лугьуз хабарар гузва.

И къундармаяр туькIуьруналди, лу­туйри чпи зенгнавай агьалидивай адан телефондиз къвезвай SMS-код чпиз лугьун ­тIалабзава. Гьа и коддин куьмекдал­ди абурувай «Госкъуллугъриз» гьахьиз жез­ва. И кар кьилиз акъу­дайла, абуру чпин «къармахра гьатнавайдаз» адан ак­ка­унтдин хатасузвал таъминарда лугьузва.

Ихьтин дуьшуьшрихъ галаз алакъалу яз, РД-дин МФЦ-дин векилри нагьакьан крар кьилел татун патал агьалийриз чпин хсуси делилар (персональные данные) садазни лугьун тавуниз ва зенгнавай касди гузвай меслятрал амал тавуниз эвер гузва.

Идалайни гъейри, интернетдин майданра государстводин куьмекдин цIийи къайдайрикай хабар гузвай, инсанрин фикир желбдай кьилер ганвай макъалаярни тIимил авач. А макъалайра ганвай ссылкайрин гелеваз фейила, агьалийриз алакъадин нумрадиз зенг авун теклифзава — меслятар къачун патал ва я арза гун патал.

РД-дин МФЦ-дин пресс-къул­лугъ­ди хабар гузвайвал, винидихъ къейднавай хьтин кьуьруькарни лутуйрин фендигарвилер хьун мумкин я. Гьар садаз чир хьун герек я, государст­водин куьмекрин цIийи серенжемрикай гьа­къикъи хабарар ведомствойрин официальный чешмейрай жагъурна кIанда.

Гьа са вахтунда РД-дин МФЦ-дин пресс-къуллугъди агьалийрин рикIел гъизва:

МФЦ-дин къуллугъчиди садрани, агьалийриз зенгна, абурувай хсуси делилар хабар кьадач ва я къуллугъар тек­лифдач;

МФЦ-дин къуллугъчиди садрани, телефондай зенгна, СМС-дай атанвай код хабар кьадач;

МФЦ-дин къуллугъчиди садрани телефондай счетрин реквизитар ва я банкунин картадин номерар хабар кьадач;

МФЦ-дин къуллугъчиди садрани СМС-ар ва электронный чарар рекье твадач (чпе ссылкайрай фена гъейри сайтриз элячIунин теклиф авай).

Мулкарин кьадар хвенва

Дагъустанди 2025-йисуз хали-къар­пуз цадай мулкарин кьадар хвенва. Идакай «Дагъустандин экономика» те­леграм-каналди хабар гузва.

Чешмеди къейдзавайвал, санлай къачурла, 2025-йисуз къарпузарни гатун халияр 8,2-8,5 агъзур гектарда цун пландик кутунва. Раижзавай къейдерай гъавурда акьазвайвал, аграрийри 200 агъзур тонндилай тIимил тушиз бахчадин бегьер кIватI хъувуник умуд ку­тунва.

Малумарнавай делилралди, 2024-  йисуз бахчадин бегьердин кьадар­ 224 агъзур тонндикай ибарат хьанай, гьа са вахтунда чешмеди къейдзавайвал, 2022-йисуз лагьайтIа, и рекъем 187 агъзур тонндиз барабар тир.

Са вацран къене

Дагъустанда 2025-йисан 1-мартди­лай етим аялар патал яшайишдин кIва­лерин сертификат къачунин арзаяр кьа­­булунин кIвалахдив гатIунда. Идакай «Дагъустан» РИА-ди хабар гузва. Агентстводи къейдзавайвал, 2025-йисуз винидихъ вичикай ихтилат физвай хьтин 220 документ гун пландик кутунва­.

Ведомстводи гъавурда твазвайвал, документар Махачкъалада авай гьар гьи МФЦ-да хьайитIани вугуз жеда.

Чешмеди раижзавайвал, са сертификатдин номинальный къимет 2 миллионни 522 агъзур манат я. Сертификат къачун патал документар кьабулун са вацран къене кьилиз акъудда — 2025-йисан 1-апрелдалди.

Гьазурайди — Муса  Агьмедов