2-мартдиз, 50 йис тамам жез 9 югъ амаз, Москвадин са азарханада азаддаказ кьуршахар кьунай 3 сеферда (1996-йис, 2004-йис ва 2008-йис) Олимпиададин, 6 сеферда дуьньядин ва гьа икьван сеферра Европадин чемпион, Госдумада Дагъустандин патай виликан депутат Бувайсар Сайтиев рагьметдиз фена. Ам Новолак райондин ЦIийи Къули хуьре — адан хайи ватанда — кучукна.
Б. Сайтиеван уьмуьр куьруьди ва гьа са вахтунда гзаф ишигълуди хьана, ам спортдин кьакьан кукIушриз акъатна. Дагъустандин вишералди жаванар патал ам кьетIен чешнедиз элкъвена. Адан бягьсериз тамашиз, жегьилрин руьгь хкаж жезвай, адан рехъ давамарун гзафбурун мурад тир. Бувайсаран бягьсериз тамашай гьар садаз чизвайвал, спортсменди неинки гъалибвал къазанмишзавай, ада вичин акьалтIай виниз тир устадвал, йигинвал, руьгьдинни бедендин лигимвал ва хъсан гьазурлухвал къалурзавай.
Спортдин рехъ акьалтIарайла, Б. Сайтиева вичин уьмуьр кьуршахар кьунай цIийи несил тербияламишуниз, спорт вилик тухуниз бахшна, активнидаказ общественный крара иштиракна. Амма, гьайиф хьи, ажалдиз мажал авач.
Бувайсар Сайтиев рагьметдиз финихъ галаз алакъалу яз адан хизанриз, мукьва-кьилийриз башсагълугъвал гайибурун арада РФ-дин Президент Владимир Путин, Дагъустандин Кьил Сергей Меликов, Чечен Республикадин Кьил Рамзан Къадиров ва масабур ава. Къейд ийин хьи, миллетдал гьалтайла Б. Сайтиев чеченви тирвиляй, ам кьиникьихъ галаз алакъалу яз, Р. Къадирован къарардалди Чечен Республикада 3-5-мартдин йикъар ясдинбур яз малумарнавай.
«Лезги газет»
