ЧIехи Гъалибвилик гьар са республикадин, шегьердин, хуьруьн агьалийрин пайни ква. Гьа гьисабдай яз, — Кьурагь райондин Ашарин хуьруьнвийрин пайни. Ватан кIеве гьатайла, Ашарин хуьряй вишев агакьна итимар куьтен, чумахъ, дергес яракьдалди эвезуниз мажбур хьана. Гьайиф хьи, 69 касдиз элкъвена хтун кьисмет хьанач.
Мегьамедэминоврин хизандай фронтдиз стхаяр Жамалдин, Нурудин, Абдурагьман фена. Жамалдинан хтул Абдурагьман НитIифовича рикIел хкизвайвал, ата-буба агакьнавай итим тир. Адахъ пуд аялни авай: НитIиф, Гьажи ва Седеф. Нурудинахъ са хва авай — Къурбан. Абдурагьман свас тагъанвай жегьил, хуьруьн комсомолрикай сад тир. Жамалдин буба — 1941-йисуз, Нурудинни Абдурагьман 1942-йисан сифте кьиляй дяведиз фенай.
Немсери Сталинград, Кеферпатан Кавказдин республикаяр, областар кьун патал чпихъ авай вири къуватар кардик кутунвай. Фронт тирвал лап къизгъин, гзаф телефвилер арадал гъизвай женгер кьиле физвай. Мегьамедэминоварни гьа женгерин иштиракчияр хьана. Бязи вахтара вил ахъайдай мумкинвални жезвачир. Цавай бомбаяр къвазвай, тупарай, танкарай алай чкаяр язавай, танкарин гуьгъуьналлаз къвезвай автоматчикрин дестейри акъваз тийиз гуьлле гузвай. Фашистриз аксивалзавай юлдашрихъ галаз ашарвийрини жуьрэтлувал къалурзавай. Душман кьибледихъ ахъай тавун патал адан вилик пад кьазвай.
— Гьайиф къвезвай кар ам яхьи, — лугьузва Абдурагьман Мегьамедэминова, — чаз чи бубайрин женгерикай са артух делилар авач. СССР-дин оборонадин министерстводин архивда авай делилралди, Нурудин 1942-йисан августдиз, Жамалдинни 1942-йисан декабрдиз къизгъин женгер кьиле физвай фронтра гел галачиз квахьна.
Нурудин бубадин уьмуьрдин юлдаш Гулизар, вил рекьел алаз, авай са хва гваз амукьна. Адан умуд атIанвачир. Къунши хуьрериз телеф хьайибур, гел галачиз квахьайбурни хтанай. Гьавиляй адани гуьзетнай вичин гъуьл. Амма…
Гулизара хва Къурбан кIвачел акьалдарна. Адахъ ирид гадани са руш ава. ЧIехи хизан Къизляр райондин Черняевка хуьре яшамиш жезва.
Жамалдинан хва НитIифа ругуд велед тербияламишна: Абдурагьман, Абдулмумин, Жамалдин, Къизхалум, Назхалум, Умуят. Абдурагьмана Германияда советрин кьушунрин реактивный дивизионда къуллугъна. Жамалдин Афгъанистандин дяведиз акъатна. Ада аскервилин буржи викIегьвилелди кьилиз акъудна, гьукуматдин медалар къазанмишна. Алай вахтунда районда яшамиш жезва, доротделдин къуллугъчи я. Адахъ кьве хва ава — Муслимни Мегьамедрасул.
Вичин уьмуьр шофервилин пешедиз бахш авур Абдурагьманан веледар Черняевкада, Махачкъалада яшамиш жезва. Русланахъ, Кемранахъ, Фатимадихъ, Жульетадихъ чпин пешеяр, хизанар ава.
Абад Азадов
