Агъа СтIал (Агъа Кран) зурба шаир СтIал Сулейманан хайи хуьр я. Хуьруьвай рагъакIидай патахъ 1 километрдин мензилда кьакьан чкадин синел (вичелай элячIайла, Кьулан СтIалдихъ рехъ фенвай мулкара) къадим заманадин сурар ава. Ана кьве сур эгъуьннава. Абурукай садай гимишдин цамар, хтар ва япагьанар жагъана, муькуьдай — гимишдин са япагьан. Тарихдин къимет авай затIар и хуьруьн мулкара мадни гзаф ава.
Хуьруьвай 6-7 километрдин яргъа, Гуьлгери вацIун эрчIи пата, къадим девирда шегьер хьайи чка ава. Адан винел патал эцигунрин амукьаяр ва чи девирдал къведалди VII-IV асиррин, гьакIни ХI-ХIII асиррин хъенчIин къапарни кIусар гьалтзава. Чкадин халкьарин арада малум тир риваятралди, ихтилат физвай чкада юкьван асиррин девирда шегьер авай.
Чи йикъара и хуьре архитектурадин памятник — жуьмя мискIин — кардик ква. Хуьруьн агъа пата Дагъустандин халкьдин шаир СтIал Сулейман хайи ва яшамиш хьайи КIвал-музей ава. 2008-йисуз майишатрин кьадар 1425-дав агакьна, агьалийрин кьадар — 2749-дав. Хуьруьнвийрикай гзафбур Агъа СтIал-Къазмайрал куьч хьана ва ана хуьр кутуна. Исятда ана 1227 майишат ва 3 агъзурдав агакьна агьалияр ава.
Мурад Мегьамедкеримован «СтIал Сулейманан район: тарихдин гелерай» ктабдай
