22-февралдиз, Ватан хуьзвайбурун йи­къан серенжемрин сергьятра аваз, Ахцегьрин цIийи спорткомплексда, РД-дин Халкьдин Собранидин депутат Владимир Ашурбегован экуь къамат рикIел хуьн яз, волейболдай итимрин командайрин арада республикадин акъа­жунар кьиле тухвана.

Спортдин мярекат, куьруь гаф рахуналди, «Ахцегь район» муниципалитетдин кьил Абдул-Керим Палчаева ачухна. Анал «Арси» карханадин гендиректор­, рагьметлу Владимиран хва Мурад Ашурбегов, республикадин агъсакъалрин Советдин векил Давидбег Черкесов, зегьметдин ветеран Алмас Шуаев, РД-дин эменнидин министерстводин чилин уп­рав­ленидин начальник, «Каспийск» командадин капитан Алифтин Къурбанов­ ва масабур рахана. Абуру турнирдин­ иштиракчияр тебрикунихъ галаз санал­ Владимир Ашурбегован экуь къамат ри­кIел хкана, Дагъустандин халкьарин арада дуствилин алакъаяр мягькемарунин карда спортдин мярекатрин важиблувал къейдна ва акъажунар вини дережадин тешкиллувал аваз кьиле тухунай Абдул-Керим Палчаеваз ва спорткомплексдин директор Сердер Моллалиеваз чухсагъул­ лагьана. В. Ашурбегован тIварунихъ галай турнир Ахцегьа гьар йисуз кьиле тухудай теклиф гана.

Къизгъин ва итижлу бягьсерин нети­жада 1-чка «Ахты» командади кьуна, 2-чка — «Каспийск» командади, 3-чка — «Дер­бент» командади. Абуруз талукь дережайрин грамотаяр, кубокар, медалар ва пулдин пишкешар гана. Сагьидов Славик (Курхуьр), Абдулвагьабов Марат (Каспийск), Османов Садикь акъажунрин лап хъсан волейболистар яз къейдна, абуруз пулдин пишкешар гана.

къейд. Вичин ери-бине Хине­рин­ хуьряй тир В. А. Ашурбе­гов­  1957-йисуз Ахцегьа дидедиз хьана.­ Ина 1-нумра­дин школа, 1980-йисуз ДГ­ПУ-дин инженервилинни­  эцигунардай­­­бурун  ф­а­культет акьал­­­тIар­­­­на­­. Ар­мия­дин жерг­ейра къул­лугъна­­. 1982­-1987-йисара ада Дагъустандин­ эцигунрин­ управленида прорабвиле ва участок­дин начальниквиле кIва­лахна. 1987-йисуз эцигунрин хсуси кархана­ тешкилна. 1994-йисуз ам «АРСИ» ЗАО-дин гендиректорвиле хкяна. «Сад тир Россия» политпартиядин векил яз, Ахцегь райондин патай РД-дин Халкьдин Собранидин  3, 4, 5 ва 6-эверунрин депутат­, «РД-дин лайих­лу эцигунардайди», «Россиядин сейли эцигунардайди» лагьай гьуьр­метдин тIва­ра­рин ва гьукуматдин­ ­патай са жерге­ грамотайрин сагьиб   ­ В. А. Ашур­бегов 2018-йисуз кечмиш хьана. Рагьметлудан­ тIвар ва къамат районэгьлийри чпин рикIера хуьзва.

Дашдемир Шерифалиев