Кьурагь райондай дяведин махсус серенжемда иштиракзавайбурун кьегьалвилерал районэгьлийри дамахзава. Абуру, ацалтзавай четинвилеризни килиг тавуна, душмандиз рикIелай тефидай ягъунар кьазва, гъалибвилин югъ мукьва ийизва.

Гьайиф хьи, женгера хкатунарни жезва.  Ватандин итижар патал вичин чан къурбанд авурбурук Азизбег Жамаловни акатзава. Женгерин майданра къалурай викIегьвиляй аскердиз телеф хьайидалай кьулухъ «Жуьрэтлувиляй» орден гана.

Кьурагь райондин администрацияда муниципалитетдин кьил Замир Азизова Жамалован уьмуьрдин юлдашдив орден вахкана.

«Ватан кIеве авай вахтунда Азизбегани Россиядин армиядин кьушунрихъ галаз Донбассдин чилер цIийи фашистрикай азадна. И карда адаз вичин чанни гьайиф атанач. Уьлкведин Президентдин указдалди ганвай орденди чи ватанэгьлидин викIегьвилин гьакъиндай шагьидвалзава. Адан игитвал чи жаванриз, жегьилриз хъсан чешне я. Ахьтин кьегьалар чна гьамиша рикIера хуьда. Гьа са вахтунда чна куь хизандин гьакъиндайни къайгъударвал чIугвада», — лагьана З. Азизова.

Абад Азадов