СССР-ди Афгъанистандин халкьдиз куьмек гун патал 40-армия рекье тунай. 1989-йисан 15-февралдиз чи аскерар Афгъанистандай ахкъуддалди, саки 9 йисан къене ана 2958 дагъвиди чпин буржи кьилиз акъудна. Гьайиф хьи, а чIулав вакъиайри тарихда ивидин гел туна. 127 дагъустанви телеф хьана.
РикI къарсурдай хабар СтIал Сулейманан райондин Вини СтIалдал яшамиш жезвай Фетилагьан хизандизни атана. Афгъанистанда Селимов Гьажиди 1984-йисуз спецназдин разведчик яз къуллугъиз башламишна. Адан командир, лейтенант Пермякова тестикьарзавайвал, Гьажи, буржидиз, Ватандиз вафалу яз, гайи буйругъ кьилиз акъудиз, гьамиша вилик жергейра жедай.
Ада 6 сеферда гуманитарный куьмекдин, суьрсетар авай машинрин колоннаяр рекье туна, 12 сеферда разведкада, 27 сеферда засадайра ва гьакIни маса женгера иштиракна. Иллаки къати ягъунар Исахейль, Кундуз, Кандагар, Саланг, Ишкамыш хуьрера, дагълара, Пандшердин дереда хьана.
Селимов Гьажидихъ галаз санал къуллугъай аскерри лагьайвал, йифиз душманди частуниз минометрай гуьлле гана, Гьажидин къвалахъ галай кьве аскер телеф хьана, адал вичелни хер хьана. ГьакI ятIани, ада кузвай палаткадай залан хирер хьанвай аскерар акъудна, амма, кьвед лагьай мина хъиткьинна, хьайи хирерикди 1985- йисан 5-сентябрдиз Гьажи госпиталдиз хутахдай рекье кечмиш хьана. Адан форма (тельняшка), грамотаяр, Яру Гъед орден, «Дирибашвиляй» медаль Вини СтIалрин школадин музейда хуьзва. Хуьруьн са куьчедиз кьегьалдин тIвар ганва.
Кьегьалар рекьидач, абурун экуь къаматар, кьегьал крар халкьдин рикIера гьамишалугъ амукьда.
Замир Мегьамедов
