Алкьвадар Гьасанан тIварцIихъ галай медениятдинни марифатдин маканди «Лезги газетдин» редакциядин куьмекдалди цIи сифте яз Дербент шегьердин мектебрин 6-классра кIелзавай аялрин арада лезги чIалайни эдебиятдай олимпиада кьиле тухвана. РикIел хкин, тагьсилдин ихьтин акъажунар «Лезги газетдин» редакцияди Махачкъала ва Каспийск шегьеррин мектебра кIелзавай лезги аялрин арада гьар йисуз кьиле тухузва. ЦIи лагьайтIа, муьжуьд лагьай сеферда яз тухвана.
Винидихъ тIвар кьунвай медениятдинни марифатдин макандин директор, «Лезги газетдин» кьилин редактор Мегьамед Ибрагьимова къейд авурвал, ихьтин хъсан адет, тежриба гила Дербент шегьердани давамарда.
ИкI, Дуьньядин халкьарин хайи чIаларин йикъаз талукьарна, 22-февралдиз Дербентдин СтIал Сулейманан тIварцIихъ галай 21-мектебда кьиле фейи лезги чIалан олимпиадада шегьердин 11 мектебдай 11 ученикди иштиракна.
Олимпиада «Лезги газетдин» кьилин редактордин заместитель Куругъли Ферзалиеван, жемиятдин деятель, Кьурагь райондин КIирийрин хуьре «Лекьрен муг» гатун милли лагерь кардик кутунвай Садикь Гьасанован, жемиятдин деятель Самур Алиеван гуьзчивилик кваз кьиле фена.
Аялриз тапшуругъар тамамарун патал 80 декьикьа вахт гана. ИкI, олимпиададин нетижада тафаватлу хьайи 5 ученикдивни абурун муаллимрив шад гьалара К. Ферзалиевани С. Гьасанова пулунин пишкешар ва дипломар вахкана.
1-чка 14-нумрадин мектебдин ученик Султан Сулейманова (адаз 10 агъзур манат ва диплом гана) кьуна, 2-чка — 9-нумрадин мектебдин ученица Хадижа Гьуьсейновади (адаз 8 агъзур манат ва диплом гана), 3-чка — 12-нумрадин мектебдин ученик Амир Алимирзоева (адаз 5 агъзур манат ва диплом гана), 4-чка — 3-нумрадин мектебдин ученица Бесханум Женетовади (адаз 4 агъзур манат ва диплом гана), 5-чка — 18-нумрадин мектебдин Тамила Багъишовади (адаз 3 агъзур манат ва диплом гана). Абуруз шаир ва публицист Мердали Жалилован «Асирдин рехъ» ктабар, тафаватлу хьайи вад ученикдин муаллимриз лагьайтIа, гьар садаз 3 агъзур манатдин кьадарда аваз пулунин пишкешар ва дипломар, К. Ферзалиеван «Тапшуругърин кIватIал» ктаб гана.
Иштиракай вири аялриз, абурун муаллимриз сертификатар ва Дагъустандин халкьдин шаир П. Фатуллаевадин «Лезги гьарфар», «Кьуьлиз кIанда Адамаз» ва «Чубарукар» ктабар пишкешна.
Лезги Фетгьуьллагь
