Алатай гьафтеда «Дагъустан» РИА-да республикадин СМИ-рин векилар Россиядин «Сифтебурун гьерекат» тешкилатдин Дагъустандин отделенидин векилар Людмила Саидовадихъ, Шевкет Курумовахъ ва федеральный тешкилатдин грантрихъ галаз алакъалу отделдин кьилин пешекар Мария Милкинадихъ галаз гуьруьшмиш хьана.
Ихтилат «Сифтебурун гьерекатдин» грантриз талукь конкурс малумарнавайдакай, ана иштиракун патал арзаяр кхьинин шартIарикай, конкурсдин гъалибчийриз государстводин патай гузвай куьмекдин кьадардикай фена.
Людмила Саидовади лагьайвал, «Сифтебурун гьерекатдин грантрин конкурс» уьлкведа пуд лагьай сеферда кьиле тухузва. Алатай йисуз Россиядин вири регионрай конкурсда иштиракайбурукай 420 организацияди 12 хиляй гъалибвал къазанмишна. Абурув, проектрин чIехивилиз, манадиз, метлебдиз килигна, 300 агъзур манатдилай 15 миллион манатдал къведалди пулар агакьна. Дагъустанвийрин пуд проектни гъалибчийрик акатна.
Конкурсдин кьилин метлеб аялриз, жаванриз чпин алакьунар къалурунин, абур уьмуьрда ишлемишунин карда пулдин жигьетдай куьмек гун я. Конкурсда «Сифтебурун гьерекатдин» векилриз, кьилдин инсанриз, гьукумдин идарайриз иштиракдай ихтияр авач. Анжах — юридический идарайриз. Конкурсдиз агакьарзавай проектарни аялрин, жегьилрин фикирар, идеяяр уьмуьрдиз кечирмишунин карда куьмек гудайбур, абур общество патал менфятлу крарал желбдайбур, санлай обществодиз хийирлубур хьана кIанда. Конкурсда гьевес авай виридавай иштиракиз жеда.
Ихьтин са шартIни ава. Л. Саидовади къейдна: «Аялрин паталай проектар туькIуьрун герек туш. Абурувай чпиз вуч итижлу ятIа, вуч герек ятIа хабар яхъ. Конкурс 12 хиляй тешкилзава. Комиссиядиз грант къачунин конкурсдиз организацияди арза вугун герек я».
Мария Милкинади конкурсдиз талукь шартIарикай суьгьбетна. Грантар патал проектар 3-мартдалди агакьарна кIанзава. Санлай конкурсдиз 1,4 млрд манат чара авунва. ЦIи пуларин кьадар тIимиларнава. 300 агъзурдалай 10 млн манатдал кьван, яни проектдин чIехивилиз, метлебдиз килигна, са организациядив 500 агъзур манат, масадав 10 млн манат агакьда. Конкурсда 6 йисалай 35 йисал къведалди яшара авайбурувай иштиракиз жеда. Проектар жуван регион патал важиблубур, итижлубур, гзаф кьадар инсанар желбзавайбур хьана кIанда.
Конкурсдин комиссиядик вири регионрай 1000 касдив агакьна векилар ква. Абурухъ галаз гъавурдик кутунин кIвалах тухванва. Гьар са проектдиз къимет гун патал халис пешекарар герек я. Гьавиляй тешкилатди абурухъ галаз генани кIвалахда.
— Конкурс гьар са аялдиз, жегьилдиз вичин алакьунар раиждай хъсан мярекат я. Конкурсда алатай кьве йисузни хейлин дагъустанвийри иштиракна, вад касди гъалибвал къазанмишна. Гилани кьулухъ акъвазна кIандач, — лагьана Шевкет Курумова.
Абад Азадов
