Малум тирвал, дяведин махсус серенжемда республикадин вири районрай ва шегьеррай тир кьегьалри иштиракзава. Хив райондин векилрини цIийи фашистрал гъалибвал къазанмишунин карда уьт­к­вемвал, дирибашвал къалурзава. Абурун арада Агъа АрхитIрин хуьряй тир Ватандин ЧIехи дяведин ветеран Агъахан Мирзаханован невеярни ава.

Стхаяр тир Герейхан, Ризахан, Агъахан Мирзаханован хтулар я. Пудани командованиди вилик эцигзавай везифаяр лайихлувилелди кьилиз акъудзава. Къуллугъзавай вахтунда пудани командованидин ва юлдашрин арада  гьуьрмет къазанмишнава.

Герейхан Мирзаханов 1984-йисан 20-  март­диз дидедиз хьана. Школада чешнелу­­­даказ кIелна, общественный крара ишти­ракна. Дагъустандин педагогвилин универ­ситетдик экечIна. Студентвилин йисар аку­на-такуна акъатна. Лекцияр, сессияр, им­ти­гьанар, зачетар… Диплом къачур жегьил Хив райондин ЦIинитIрин юкьван школадиз рекье туна. 2008-йисуз ада Россиядин оборонадин министерстводихъ галаз икьрар кутIунна.

Чирвилер ва алакьунар авай жегьилдал командирвилин везифаяр ихтибарна. Мирзаха­нов са дивизиядин женгининни сиясатдин кIва­лах тухунин рекьяй командирдин заместителвиле тайинарна. Аскеррин низамдал, уставдин­ къалурунар ва везифа­яр кьилиз акъуд­завай гьалдал, руьгьдин жигьетдай мягькем хьунал­ гуьзчивалзавай офицер датIана аскеррин юкьва жедай. Аскервилиз фад желб авунвайбуру цIийиз атанвайбур гъуьнтIуьник кутунин вилик пад кьадай серенжемар кьабулдай. Хсуси везифайрив жавабдарвилелди, намуслуви­лелди, пешекарвилелди эгечIзавай офицер 2010-йисуз разведкадин артиллериядин взводдин командирвиле тайинарна. Вад йис­ни алатнач, адакай радиолокационный станциядин ­начальник хьана. 2021-йисалай Герейхан Мирзаханов дивизиондин штабдин начальник я.

Украинада дяведин махсус серенжем кардик кутурдалай инихъ женгерин майданда­ авай ва дирибашвал къалурзавай капитан Мирзаханов «Дяведин къуллугъда тафаватлу хьунай» III дережадин, «Женгера тафаватлу хьунай», Суворован медалрин ва хейлин грамотайрин сагьиб я.

Ризахан Мир­за­ха­нов­ 1990-йисан 28 ян­вар­диз дидедиз хьана. Дагъус­тандин поли­тех­­колледж­дин радиотехни­кадин фа­­культет­ куьтягьай жегьилди Россиядин армия­дин жергейра къуллугъна, ам анай сержант яз хтана. 2014-йисуз Риза­хан икьрар­дин­ бинедаллаз Россия­дин армияда къуллугъ авунив­ эхгечIна. Ада Ка­бар­дино-Балкарияда къуллугъза­вай. Украинадин миллетбазри­ Донбас­сдал ве­гьей­ла, агъа-архитIвиди ГРУ-дин спецназдин­ 346-бри­га­дадин саперрин дестедик кваз, кIе­ве авай ватанэгьлийриз куьмек гана.

Идалай гуьгъуьниз Р. Мирзаханова Владикавказда, Юнус-Бек Евкурован тIвару­нихъ галай разведкадин бригададик кваз Сирияда ва Ливияда важиблу везифаяр тамамарна. Вичел тапшурмишай крар рехне квачиз, зирекви­лелди кьилиз акъудунай адан ала­кьунар «Жен­гера тафаватлувиляй», «Къиз­­гъин женгера иштиракунай» медалралди­­ къейдна.

Дяведин махсус серенжемда Р. Мирзахано­ва минометрин дивизиондик кваз душмандиз ягъунар кьазва. 2003-йисуз адаз лейтенантвилин чин гана. Ам исятда мино­метрин дивизиондин взводдин командир ва алакъадин начальник я. СВО-да къалурай кьегьалвилерай Ризахан «Жуьрэтлувиляй» Жукован­, Суворован, «Гьунарлув­иляй II де­ре­жа­дин, «СВО-дин иштиракчи» медалриз лайихлу хьанва.

Дяведин ветеран Агъахан Мирзаханован невейри къе чи Ватандин итижар хуьзва, бандеровчияр тергзава, абурукай Донбассдин чилер азадзава.

Абад  Азадов