И мукьвара чав хабар агакьайвал, Россиядин армияда къуллугъзавай майор Мурад Абумуслимов «Жуьрэтлувиляй» орден гуниз лайихлу хьана. Хиврин хуьряй тир офицерди дяведин махсус серенжемдив эгечIай сифте йикъарилай миллетбазрихъ галаз женг чIугвазва. Ам къастуналди, викIегьвилелди, гьунарлу­вилелди тафаватлу жезва, душмандиз ягъу­нар кьазвай юлдашризни чешне къалур­зава. Командованиди вилик эцигзавай тапшуругъар лайихлувилелди, миллетбазрин планар чIуруналди, абуруз гзаф зиянар гуналди тамамарзава.

Украинадин миллетбазрихъ галаз кьиле физвай женгер­ иллаки сифте варцара четинбур, телефвилер гзаф арадал гъайибур тир. Гьа уламрайни Мурад Абумуслимов ви­кIегьвилелди экъечIна. Бедендал хирер хьайилани, ада зайифвал къалурнач. КIвачел ахкьалтнамазди, ам вичин частуниз, юлдашрин патав хъфена.

Ватан патал чанни гуз гьазур офицердин игитвилер «Жуьрэтлувиляй», «Авдеевка азад авунай», «Ватандин вилик лайихлувилерай» II-дережадин, «Женгера лайихлувилерай» медалралди къейднава. Дагъустандин жемиятдини викIегь офицердин крариз дуьзгуьн къимет — республикадин жемиятдин шабагь — «Къизилдин гъед» ва «Дагъус­тандин халкьдин игит» тIвар гана.

Райондин администрациядин кьил Ярмет Ярметова Ватандин вилик вичин буржи намуслувилелди тамамарзавай Мурад Абумуслимоваз орден гун тебрикна ва хуш гафар лагьана.

*  *  *

Дербент райондин администрациядин кьил Мавсум Рагьимов дяведин махсус серенжемдин иштиракчи, прапорщик Валид Амировахъ галаз гуьруьшмиш хьана. Рубас хуьряй тир кьегьалди уьлкведа машгьур тир Кантемирован дивизияда къуллугъзава. Идал къведалди ада РФ-дин ФСБ-дин сергьятдин кьушунра вичин везифаяр тамамарнай ва ам отставкада авай. Украинада дяведин махсус серенжемдив эгечIайла, Амиров гуьгьуьллувилелди къуллугъ ийиз фена.

Махсус серенжемда Кантемирован дивизияди командованидин лап четин тапшуругъар кьилиз акъудзава, душмандиз еке зиянар гузва, адан техника, аскерар, беспилотникар тергзава. Виридахъ галаз санал Валид Амировани гьунарар къалурзава. Харьковдин чилел кьиле физвай женгера ада разведчикдин-сапердин везифаяр тамамарна. Адан хурудал «Жуьрэтлувиляй» орденди, «Дирибашвиляй» медалди нур гузва.

Райондин администрациядин кьилинни прапорщикдин арада суьгьбет кьиле фена. Амирова Россиядин армиядин ва вич авай дивизиядин агалкьунрикай ихтилатна, серенжемдин иштиракчийрин, абурун хизанрин патахъай къайгъударвал авунай Мавсум Рагьимоваз сагърай лагьана.

Муниципалитетдин кьили дирибаш пра­порщикдиз «Дербент райондин вилик кье­тIен лайихлувилерай» тафаватлувилин лишан гана.

*  *  *

Дербент райондин агьалийриз яшайишдин рекьяй къуллугъдай центрадин директор Исмаил Исмаилов гуьгьуьллувилелди дяведин махсус серенжемдиз фена.

Райондин адмиистрациядин кьил Мавсум Рагьимова, администрациядин къуллугъчийри Исмаил Исмаилов шад гьалара СВО-диз рекье туна. Гьа са вахтунда райондай серенжемда иштиракзвай вири аскерриз, абурун хизанриз герек куьмекар гудайдакай лагьана.

Администрациядин пресс-къуллугъди къейдзавайвал, Исмаилов вичихъ галаз­ санал кIвалахзавай юлдашриз гьамиша чешне къалурзавай ксарикай тир. Вуж кIеве гьа­тай­тIа­ни, адав Исмаилован куьмек агакьдай. Хъсан пешекарди, регьберди, регьимлу, къени инсанди вичин краралди коллективдин ва администрациядин арада лайих­лу гьуьрмет къа­занмишнава. Са рахунни алач, ада вичин алакьунар махсус серенжемдани къалурда. Юл­дашри ватанпересдиз гъалиб хьана хтун алхишна.

Хийир  Эмиров