Къурбанд сувар Зуль-Гьижжа вацран 10-юкъуз алукьзавай еке сувар я. ЦIи мусурманри ам 21-августдиз къейдда.
И юкъуз як паюналди къурбандар ийидай (садакьаяр гудай) адет ава. Пак Къуръанда и месэладиз талукь яз кхьенва: “Аллагь-Таалади иман гвай вирибуруз икI лугьузва: “Аллагь рикIел гъиз, капI-тIеат ая, къурбандар це”.
Мугьаммад пайгъамбарди (с.а.с.) лагьана: “Къурбанд сувариз гьайван тукIун хьтин кардилай хъсан кар инсанди Аллагь рази хьун патал гьеле авунвач. И къурбанд Къияматдин юкъуз гьайвандин хам ва крчар алаз пайда жеда”.
Къурбанддин шартIар
Къурбанд авун патал тукIваз хкянавай гьайван кьецIиди, буьркьуьди хьун герек туш. Крчар, япар, тум ва жендекдин маса паярни сагъбур хьун лазим я.
Исламдин къанунралди ихьтин гьайванар къурбанд авун патал тукIвада: йис тамам хьайи лапаг (хеб ва я гьер), кьве йис хьайи цIегь ва я жунгав (кал), вад йис хьанвай деве. Лапаг — са касдилай, деве ва я жунгав (кал) ирид касдилай къурбанд ийиз жеда.
ТукIвадай вахт ва къайдани тайинарнава. Месела, гьайван суварин капI авурдалай кьулухъ та кьуд лагьай йикъан няни жедалди (атран азан гудалди) тукIваз жеда.
Гьайван тукIвадайла:
Ният ийида (яни флан касдилай Аллагь патал за и гьайван къурбанд ийизва).
“Бисмиллагь”-дилай гуьгъуьниз пуд сеферда такбир (Аллагьу Акбар) ийида.
Гьайван кьибледихъ элкъуьрна ихьтин дуьа кIелда: “Я Аллагь, им Вун патал ва Ви патай я. Кьабула завай (флан касдилай — эгер масада вичин паталай къурбанд авун векилнаваз хьайитIа)”. Пайгъамбардал (с.а.с.) салават гъида (Аллагьумма салли аля саййидина Мугьаммадин ва аля али саййидина Мугьаммадин ва саллим).
“Бисмиллагьи, Аллагьу Акбар” лагьана, тукIвада.
Сувабдин къурбанддин як пуд патал паюн меслят къалурзава: са пай — кесибриз, кьвед лагьай пай — къуншийризни багърийриз, пуд лагьайдини — жуван хизандиз (къурбанд авур гьайвандин хам маса гудай ихтияр авач, садакьа хьиз гайитIа жеда).
Незир авур (яни, са кар туькIуьн патал хиве кьунвай) къурбанд, жува тIуьн тавуна, михьиз кесибриз паюн лазим я.
Шамил Омаров
