Тапшуругъ ганва

РФ-дин Президент Владимир Путина Украинадай ва мидявалзавай маса уьлквейрай чи ватандашрин телефонриз къвезвай тахсиркарвилин зенгерин вилик пад кьадай серенжемар кьабулунин тапшуругъ ганва. Ихьтин фикир Кремлдин сайтда чапнавай тапшуругърин сиягьда гьатнава.

«Россиядин Гьукуматди Россиядин ФСБ-дихъ, МВД-дихъ <…> галаз санал Украинадин мулкарай ва дуствал авачир маса уьлквейрай тахсиркарвилерин макьсадралди къвезвай телефондин зенгерин вилик пад кьунин, гьакIни Россиядин ватандашрин ихтиярар ва къанундин итижар хуьнин, алай аямдин информациядинни коммуникацийрин технологияр ишлемишуналди кьилиз акъудзавай тахсиркарвилерин вилик пад кьунин мураддалди герек тир серенжемар кьабулун тапшурмишзава», — лагьанва документда.

Серенжемар алай йисан 1-июлдалди тамамарун­ лазим я. Уьлкведин регьберди и карда жавабдар ксарни тайинарнава — премьер-министр М.Мишустин, ФСБ-дин кьил А. Бортников ва МВД-дин кьил В. Колокольцев.

Чешмедин делилралди, къуншидаллай уьлкведай­ чIуру ният авайбуру са къатда россиявийриз зенгер ийизва. Лутувилин кьуьруькралди пул чуьнуьхунилай­ гъейри, абуру чи ватандашар дараматриз, банкариз­ цIай ягъуниз мажбурзава. ФСБ-дин къуллугъчийри къейдзавайвал, нагьакьан ният авайбуру чпин гьерекатар Украинадин махсус къуллугърин гуьзчивилик кваз кьилиз акъудзава.

60 агъзур аскер тергнава

Военный корреспондент Е. Поддубныйдин делилралди, Курскдин мулкара Украинадин кьушунрай 60 агъзур кас терг хьанва. Идакай «Регнум» чешмеди хабар гузва.

Идалай вилик РФ-дин оборонадин министерстводи регионда женгер кьиле фейи вахтунда ВСУ-дай 59 агъзурдалай виниз ксар тергнавайдакай хабар ганай.

«РагъакIидай патаз, гьелбетда, и делилар пуд кепекдайни туш. Ана анжах материалдин жигьетдай хьан­вай зарардин патахъай я къайгъу чIугвазвайди…», — кхьенва журналистди.

6-февралдиз РФ-дин Яракьлу Къуватри Курскдин мулкара украинвийрин акси гьужумдин вилик пад кьуна­.

«Ислягьвилин лиф» хьиз аквазвач

«РИА Новости» чешмедин журналистди кхьизвайвал, США-дин патай махсус илчи К. Келлоган руша­ Украинадиз куьмек агакьарунин крар тешкилзава, Америкадин патай къалмакъалда пулунихъ иштиракзавайбур анай ахкъудзава. Ихьтин делилри Келлог «ислягьвилин лиф» туширдан гьакъиндай шагьидвалзава.

Аналитикди суал гузва: «Украинада гьалар пайгар­вилик кутунин рекьяй Трампа тайинарнавай махсус илчиди ислягьвилин рахунар кьиле тухун тIалабун, гьа са вахтунда рекьизвай украинвийралди къазанмишун иер кар жезвани?».

Макъалада къейдзавайвал, пулунихъ Украинада­ къуллугъ кьилиз акъудзавай США-дин агьалийрин мес­эла уьлкведин кьиле авайбур патал тIал алайди я. ЧIуру таблигъатдалди кьилер ацIурна, гуя Украинадин азадвални аслу туширвал патал женгера иштиракунал желбна. Са йис идалай вилик США-дин оборонадин министрдин виликан меслятчи Д.Макгрегора гьа чIавалди Украинада кьейи америкавийрин кьадар малумарнай. «И вахтунда Украинада агъа кIан 400 америкави кьена. Гьабурун жергеда пулунихъ кьунвайбурни, аскерарни ава», — лагьанай ада.

Мумкин тир зарар

Европадин союзди Россиядиз акси санкцийрин муддат артухар хъувуникди Венгриядиз са шумуд миллиард евродин зиян жеда. Ихьтин фикир Венгриядин къецепатан крарин ва экономикадин алакъайрин рекьяй министр П. Сийяртоди «РИА Новости» чешмедиз малумарна.

Адан гафаралди, эхиримжи пуд йисуз уьлкведин экономикадиз, санкцияр себеб яз, 19 миллиард евродин зиян хьана. Акси серенжемар мадни давамар хъувуни алава зарар хьунал гъида. Мисал яз, 6 вацра жедай зарар 3-4 миллиард евродикай ибарат я.

Санкцийрин жигьетдай ЕС-дин махсус илчиди хабар ганвайвал, Россиядиз акси яз кьабулдай санкцийрин 16 лагьай сиягьда 50 жуьредин метягьар гьатун мумкин я. Ада и месэла Къазахстандихъ галаз веревирд авунвайдакай ихтилатна.

Гьазурайди — К. Ферзалиев