Алатай гьафтеда Дагъларин уьл­кведин меркезда, Дуствилин кIва­ле, федеральный ва республика­дин СМИ-рин веки­лар Украинада­ кьиле тухузвай­ дяведин махсус серенжемдин­ иштиракчи, женгинин майданда кьетIен викIегьвал къалурай гуьгьуьллу аскердихъ-раз­ведчикдихъ галаз гуьруьшмиш ­хьана.

Сиясатдин ва ватанпересвилин жигьетдай еке метлеб авай мя­рекатда Дагъустан Республикадин Гьукуматдин Председателдин заместитель Рамазан Жафарова, РД-дин Кьилин ва Гьукуматдин Аппаратдин регьбер Махач Омарова, Россиядин Игит, РД-дин Хатасузвилин советдин секретарь Мегьамед Баачилова, РД-дин Кьилин ва Гьукуматдин Администрациядин регьбердин заместитель, РД-дин Кьилин ва Гьукуматдин информациядин сиясатдин управле­­нидин ва пресс-къуллугъдин на­чальник Рашид Акавова, РД-дин­ ин­фор­мациядин ва печатдин агент­­стводин, жемиятдин теш­ки­лат­­­рин векилри ва масабуру ишти­ракна.

Закарья Алиеван викIегьви­ли­кай къе неинки Россияда, гьакI вири дуьньядани малум хьанва. Запорожьедин областда женгинин­ тапшуругъ тамамарзавай десте миллетбазрин гьужумдик акатна­. Садбур телеф хьана, масадбуру­ кьулухъ чIугуна. Вилик фидай, тапшуругъ тамамардай мумкинвал авачир. Хер хьанвай разведчик Закарья Алиев гьа чкадал аламукьна. Юлдашрини, командов­а­ниди ам телеф хьанвайбурун сиягьдик кутуна. Амма дагъустанви кьегьалдал чан аламай. Ам чпи кьунвай пулеметар алай чкаяр, сенгер  душмандикай кьилди хуьниз мажбур хьана. Миллетбазри шумуд гьужум авунатIани, Закарьяди абуруз дуьздаказ жаваб гана. Адав автомат (телеф хьайи аскеррин ва душмандин яракьарни) ва вад гранат гумай. Пуд гьафтеда ада сенгер кьилди хвена. Гьатта ара-ара душмандал гьужумдин гьерекатарни авуна. Нацистрин дронрихъ галазни женг чIугуна. Пуд гьафтедилай чи беспилотникрин оператордиз Закарья акуна ва ада командованидиз разведчикдал чан аламайдакай, ада кьилди душмандихъ галаз женг чIугвазвайдакай малумат гана. ВикIегь разведчикдиз куьмек гудай мумкинвал авачир. Адал цавай «вахъ такьат аматIа, чи патахъ ката, чна ви рехъ душмандикай хуьда» гафар кхьенвай чар агакьна. Пуд гьафтеда суьрсетдикай магьрум хьанвай  (ада мукьваривай  жагъай  чичIе­кар незвай, яд хъвазвай) разведчик вичиз къалурай уламдай чибур галай терефдихъ катна ва сагъ-саламатдиз агакьна.

И кардикай хабар хьанмазди, РД-дин Кьил Сергей Меликов теле­фондай разведчикдин диде Алиева Халисатахъ галаз рахана­ ва адаз къагьриман хва тербияламишунай рикIин сидкьидай сагърай лагьана. Закарья Алиеваз «Жуьрэтлувал къалурунай» медаль гудай указни акъудна. И шабагь, гражданвилин, ас­кервилин къуллугъдин везифаяр кьилиз акъуддайла, викIегьвал, жуьрэтлувал, къагьриманвал къалурайбуруз гузва.

Медаль вахкудайла, Махач Омарова Закарьядин игитвилел неинки дагъустанвийри, гьакI вири Россиядин агьалийрини дамахзавайдакай, гьейранвалзавайдакай лагьана.

«Ихьтин игитвал акьалтзавай несил Ватандал рикI алаз тербияламишун, герек вахтунда жуьрэтлувал къалурдай къаст хьун патал лап хъсан чешне я. Чна и мукьвара махсус серенжемдин иштиракчийриз идара авунин карда чпин алакьунар къалурдай «Дагъларин гьунар» программа кардик кутунва. Агъунва, женгерин майданда къазанмишнавай тежрибадикай чи аскерри  гьукумдин органра къуллугъар кьурла, менфят къачуда», — лагьана М. Омарова.

— Закарья Алиева вич гьикьван четин шартIара гьатнатIани, ха­лис­ дагъустанвидин къилих, мягькем руьгь, сабурлувал къалурна, вичин вилик эцигнавай везифаяр эхирдалди кьилиз акъудна, — лагьана Рамазан Жафарова. — Уьмуьр­ давам жезва, ви кьетIен къилихар чаз республикада лап герек къведа. Вуна чи халкь патал­ къени крар ийида. Кьегьал хва тербияламишай Халисат дидедиз баркалла ва сагърай лугьуз кIан­зава. Ада вич тухвай тегьердиз халис игитвал лугьуз ­жеда.

Мярекатдал мадни юлдашар рахана. Вирида Закарья хьтин кье­­гьалар, игитар майдандиз акъуд­­завай Да­гъус­тандин диде-бу­­бай­рин, хизанрин тIвар­цIихъ хуш келимаяр лагьана.

Эхирдай Махач Омарова намуслудаказ зегьмет чIугвазвай, гьар са хилен агалкьунар раиж­за­вай, кар алай месэлайрикай кхьиз­вай журналистриз сагърай лагьана.

Абад  Азадов