Сергей Меликова республикадин къанун-къайда хуьдай органривай, Украинада кьиле физвай махсус серенжемдикай даях кьуна, шабагьар маса гузвай лутуйриз талукь яз ахтармишунар тухун буйругънава. Ихтилат жемиятдин «Дагъустандин игит» медалдикай физва.
Республикадин Кьили Дагъустандин Хатасузвилин советдин секретарь Мегьамед Баачиловал февралдин вацран эхирралди кьиле тухвана акьалтIардай ахтармишунрин нетижайриз талукь доклад гьазурун тапшурмишнава.
С.Меликова вичин телеграм-каналда кхьенвайвал, Дагъустандин яшайишдин жуьреба-жуьре хилера, гьа жергедай яз Ватан хуьнин кардани, агалкьунар къазанмишзавай дагъустанвийрин лайихлувилер къейд авун патал гьукуматдин бес кьадар шабагьар ава.
«Гьеле тамамдиз ахтармиш тавунвай малуматралди, «Дагъустандин игит» шабагь вуж игит ятIа ва вуж туштIа тайинарунин жигьетдай чпихъ са жуьрединни ихтиярар авачир ксари пулдихъ маса гузва. Жуьреба-жуьре чешмейри раижзавайвал, медалдин къимет 300 агъзурдав агакьзава. Гьайиф къведай кар ам я хьи, Ватандин къуллугъда акъвазнавай вафалу, кьегьал бязи гадаяр лутуйрин «къармахра» гьатна. Шабагьралди алверчийриз регьятдиз пул къазанмишдай рехъ жагъанва. Амма чна СВО-дин иштиракчияр садавни алцурариз тадач…», — кхьена Сергей Меликова вичин телеграм-каналда.
Агьмед Магьмудов
