Дагъустандин Кьил Сергей Меликован тапшуругъдалди республикадин Гьукуматдин Председатель Абдулмуслим Абдулмуслимов республикадин муниципалитетриз мугьман жезва ва анра яшайишдинни экономикадин жигьетдай авай гьаларихъ галаз чкайрал мукьувай таниш жезва.
«Лезги газетдиз» РД-дин Гьукуматдин пресс-къуллугъди хабар гайивал, 5-февралдиз премьер-министр Дагъустандин Огни шегьердиз фенвай. Къейд ийин хьи, алатай йисан эхирра шегьердин мэрвиле СВО-дин иштиракчи Замир Гьажимурадов тайинарнава. Адахъ ва республикадин са жерге министерствойринни ведомствойрин регьберрихъ галаз санал А.Абдулмуслимов шегьерда кьилиз акъудзавай проектрихъ, ина кардик квай яшайишдин са жерге идарайрин кIвалахдихъ галаз таниш хьана, администрациядин активдихъ галаз совещание кьиле тухвана.
Шегьер вилик тухуникай рахадайла, Гьукуматдин Председателди къейд авурвал, махсус программадин сергьятра аваз ина жемиятдин мулкар авадан ийида, рекьер къайдадиз хкида, хъвадай цин къурулуш цIийикIа туькIуьр хъийида ва са жерге маса кIвалахар кьилиз акъудда.
8-февралдиз Абдулмуслим Абдулмуслимов Леваши ва Акуша районриз мугьман хьанвай. Анра кьиле тухвай кIвалахдикай гегьеншдиз РД-дин Гьукуматдин сайтдай кIелиз жеда.
Чи мухбир
