Гьазур жезва

Дагъустандин аграрияр чуьлда гатфарин кIвалахар кьиле тухуниз гьазур жезва. Идакай «Дагъустан» РГВК-дин телеграм-каналди хабар гузва.

Кьилди къачуртIа, чешмеди къейдзавайвал, 2025-йисуз республикада гат­фарин тумар 230 агъзур гектардилай гзаф мулкуна цун фикирда кьунва. Цадайбурук техилдин, техилдинни пахладин жинсинин набататар, картуфар ва маса магьсулар акатзава. Раижзавай къейдерай гъавурда акьазвайвал, алай вахтунда саки 100 агъзур гектарда цанар цанва.

Чешмедин делилралди, гатфарин тумар цун патал 75 агъзур тонндив агакьна тумарин ва тумунин маса материалар герек къвезва. Республикадин чуьллера гатфарин кIвалахар кьиле тухунин серенжемра 500 уьлчмедилай гзаф техникади иштиракзава.

Къейдзавайвал, са бязи районра фад кIватI хъийидай картуфар гьеле февралдин эхирра, мартдин эвел кьилера цун пландик кутунва, накьвада чимивал 12 градусдилай алатай вахтунда. Ихьтин дуьшуьшда бегьер гьеле майдин эхирра, июндин эвел кьилера вилив хуьз жеда.

Хкаж хьун вилив хуьзва

Дагъустандин пуд шегьерди хъвадай цин тарифар хкаж хьун вилив хуьзва. Идакай «Дагъустандин Экономика» телеграм-каналди хабар гузва.

Кьилди къачуртIа, чешмеди къейдзавайвал, РД-дин энергетикадин ва тарифрин министерстводи вичин приказралди республикадин пуд шегьердин яд ишлемишзавай агьалияр патал тарифар тайинарнава. Идан гьакъиндай махсус документ правовой информациядин порталда эцигнава.

ИкI, Дербентдин агьалияр патал 2025-йисан 1-февралдилай 1 кубометр цин къимет 34 манатни 9 кепекдиз барабар жеда (икьван гагьди саки 14 манат тир).

Къейдзавайвал, винидихъ къалурнавай муддатдилай хъвадай цин къимет гьакI Кьиблепатан Сухокумскда — 19 манатни 47 кепекдал ва Буйнакск шегьерда 36 манатни 18 кепекдал кьван хкаж жеда.

Гьа са вахтунда хабар гузвайвал­, винидихъ къалурнавай гьар са шегьер­дин округда хъвадай цин къимет 2029- йисалди яваш-яваш виниз акъат­да: Дербентда 1 кубометр яд — 45,3 манатдал, Кьиблепатан Сухокумскда — 25,2 манатдал, Буйнакск шегьерда — 40,2 ма­натдал кьван.

4 % тIимил

Махачкъаладин гьуьлуьн алишве­ришдин портуни 2024-йисуз парар ичIи­рунин кьадар 4 процентдин тIимил ва ам 2,8 миллион тонндилай са кIус гзаф тир рекъемдикай ибарат хьанва. Идакай, гьуьлерин алишверишдин портарин Ассоциациядин (АСОП, Ассоциации морских торговых портов) материалрал асаслу яз, «Дагъустандин экономика» телеграм-каналди хабар гузва.

Чешмеди кхьизвайвал, месела, къунши Астрахандин областдин порта­ра и рекъем 4,1 процентдин виниз хьанва — 3,9 миллион тонндал кьван.

Махачкъаладин гьуьлуьн алишверишдин портуна гьам «кьуру», гьамни «цадай» парар ичIирунин кьадар тIимил хьанва. Гьа са вахтунда карханади раижзавай делилрай чир жезвайвал, 2024-йисуз Махачкъаладин пор­ту­нин «гъилиз атай пулдин» (выручка) кьадар 44 процентдин гзаф хьанва.

Улакьар къачун патал

Махачкъала шегьердин администра­цияди 2025-йисуз транспортдин 97 уьлч­ме къачунин макьсаддалди «Уьмуьр­ патал инфраструктура» милли проектдин сергьятра аваз «Общественный транспорт вилик тухун» федеральный проектда иштиракун патал арза вуганва. Идакай Махачкъала шегьердин кьилин заместитель Рустам Мегьамедова вичин телеграм-каналда хабар гузва.

Къейдзавайвал, винидихъ тIвар кьун­вай серенжемдин сергьятра аваз къа­чун патал арза вуганвай улакьрин сиягь­дик агъадихъ галай автобусар акатзава:

20 автобус — гъвечIи классдинбур;

59 автобус — юкьван классдинбур;

8 автобус — чIехи классдинбур;

10 автобус — кьетIенвал авай чIехи классдинбур.

Гьазурайди – Муса  Агьмедов