20-февралдиз ДГПУ-да республикадин вузра кIелзавай студентрин арада лезги публицистикадай пуд лагьай сеферда конкурс кьиле фида. Вилик йисара хьиз, цIини тешкилатчийрин арада «Лезги газетдин» редакция, лезгийрин милли медениятдин федеральный дережадин автономия (ФЛНКА) ва Алкьвадар Гьасанан тIварцIихъ галай центр ава.

Конкурсдин кьилин макьсад республикадин вузра филологиядин ва Дагъустандин филологиядин факультетра кIелзавай студентрин арадай алакьунар авай студентар винел акъудун, абурун агалкьунар къейд ва абур милли журналистикадиз желб авун я.

Иштиракчийриз гузвай тапшуругърик лезги публицистикадай тестер тамамарун, лезги чIалал кхьенвай текст стилистикадин жигьетдай къайдадик кухтун, орфографиядин ва пунктуациядин гъалатIар туькIуьр хъувун ва тайин са темадай куьруь макъала кхьин акатзава.

Гъалибчийриз (сифтегьан 5 чка кьурбуруз) дипломар, ктабар ва 25, 20, 15, 10, 5 агъзур манатдин кьадарда аваз пулдин пишкешар гуда.

«Лезги газет»