Эхиримжи вахтара са карди заз секинвал гузвач: уьмуьрдин чIехи пай жуван багъри «Лезги газетдихъ» галаз сих алакъада аваз фенвай, адан кIвалахдик жувалай алакьдайвал къуьн кутаз, куьмек гуз алахъай зун, начагъвал себеб яз, садлагьана адавай къакъатна. Гила саки са йис кьван жезва за аниз са затI кхьин тавуна. Амма газетдин гьар са нумра за цIарба-цIар кIелзава, газетдин гьал гьикI ятIа, зун гъавурдик ква. Нубатдин йис патални за ам, гьамиша хьиз, районда виридалайни вилик кхьена. Бязибуру лугьузни хьана: «Вахтар ацIана ама. Икьван фад вучиз кхьизва?». Гьар са кардиз вичин вахт авайди я. И гафар зи жаваб тир хабар кьурбуруз. Танишбурни, къуншиярни гьа и тегьерда гъавурда тун зун патал адетдиз элкъвена. Алукьнавай йис патал «кьулухъ кьил кьазвай» са шумуд касни желбна.
Ингье фадлай тахтанвай 12-декабрдин нумра хкана почтальонди. Лап «иштагьдивди» кIелна са кьилихъай вири газет. Эхиримжи чинин агъадай Азиз Мирзебегован «Хъсан фикир я» макъалади, гьелбетда, зи фикирни желбна. Ада вичин вахтунда масабурузни даях ва куьмекчи хьайи бажарагълу шаир СтIал Мислиматан (шикилда) тIварунихъ районда са куьче ягъун патал Гьаким Къурбанан теклифдиз къуватни гузва, вичин фикирни ачухарнава. Кьве алимдини дуьз кьатIанва, дуьз лугьузва. Маса тIварар а шаир дишегьлидал чан аламаз агакьнач. Мислимат хала заз хъсандиз чидай, ам шаир, диде, меслятчи, куьмекчи, активист, тербиячи тир. Алимрин фикиррин тереф зани хуьзва. Амма куьчедихъ къекъведай, суракьдай кар авач. Рагьметлу шаирдин кIвалер авай, къерехдани тарар, абурулай анихъай хьиз къубу галай гегьенш куьче адан тIвар гуниз кутугайди я. Куьчедихъ хъсан гьяркьуьвал, Ленинан памятникдал кьван вижеваз яргъивални ава. КIанзавайди хуьруьн ва райондин администрацийри герек тир къарар акъудун, ам къуватда тун я. За, чкадин агьалиди хьиз, анин тариф авуна. Заз а чкаяр чизвайвиляй, мукьвал-мукьвал ана жезвайвиляй. Дугъриданни, лезги шиират, литература, санлай эдебият вилик финик вичин вахтунда еке пай кутур СтIал Мислиматан тIварцIихъ ягъуниз кутугнава а куьче, вири истемишунризни жаваб гузва. Идалайни гъейри, анаг аяларни галаз ада шткиз, михьи ийиз хьайидини магьледа авайбуруз чизва. Вич яшамиш хьайи, хизан хвейи, яратмишунралди тIвар машгьур авунвай Кьуланхуьре ада шииратдин дерин гел тунвайди неинки и хуьруьнбуруз, гьакI къунши хуьрерин агьалийризни, райондилай къецени хъсандиз чизва. И баркаллу хизандай, хтуларни кваз, пуд кас шаирар акъатна, и рехъ давамарзава. И куьче СтIал Мислиматан тIварцIихъ ягъайтIа, баркалладин кар жеда, «ахпа» «пака» лагьана кIандач. Мукьва вахтара, белки, и карни кьилиз акъатна, чаз шадвал гъин.
Заз макъала бажарагълу шаир дишегьлидин 90 йис къейддайла (20.03.2014-й.) кхьей «Мислимат хала» шиирдай са бендиналди куьтягьиз кIанзава.
Акьулдиз дерин, кьатIунриз еке,
Мислимат хала, вун я чаз диде.
Шииратдин чаз мягькем тир къеле
Эцигнава на, Мислимат хала.
Райсудин Набиев,
РФ-дин писателрин союздин член
