Са шумуд югъ идалай вилик Кас­пийск­­да, Али Алиеван тIварунихъ галай­ спортдин дараматда, Россия­дин Игит Темирлан Абуталимоваз­ гьуьр­мет­ авунин лишан яз, ушу-сань­дадай Дагъус­тандин чемпионат ва кIвен­кIве­­чивал патал акъажунар кьиле фена. Ана рес­публикадин саки вири районрайни шегьеррай тир 300-далай виниз жегьилри иштиракна. Вичин ери-би­не Мегьа­рамдхуьруьн райондин Хъар­­тас-­Къаз­майрилай тир Шалбуз Эседул­лаев 85 кг-дал къведалди заланвал авайбурун арада Дагъустандин чемпионвилин тIварцIиз лайихлу хьана.

РикIел хкин: 2017-йисуз Дербент­­­да ушу-саньдадай Дагъустандин кIвен­кIве­чивал патал кьиле фейи акъажун­рани  Ш. Эседуллаева (46 кг-дин заланвал авайбурун арада) 1-чка кьунай.

Шалбуз 2003-йисуз дидедиз хьана. Ада тренер Даир Женетханован гъилик устадвал хкажзава. Шалбуза­ спортдин са шумуд жуьредай, кьилди къа­чуртIа, панкратиондай, ММА-дай, женги­нин сам­бо­дай­ни вичин къуватар ахтармишзава­. ММА-дай ам Дагъустандин кIвен­кIве­чи­вилин тIварцIиз 4 сеферда­ лайихлу хьана, Кьиблепатан Дагъустандин — 3. Чи ватанэгьли дуьньядин Кубокдин (акъажунар Анапа шегьерда кьиле фена) сагьиб, гьевескаррин арада­ ­ре­кордсмен я. Ада спортдин и жуьредай Дагъустандин, гьакI Кавказдин ачух кубокар патал акъажунра 1-чкаяр кьуна, панкратиондайни агалкьунар ава. Кьилди къачуртIа, ам Да­гъус­тандин кIвен­кIве­чивал патал акъажун­рин­, международный турниррин гъалибчи, Мос­квадин ачух Кубокдин сагьиб я. Женгинин самбодай международный турнир­ра гъалибвилер къазанмишунихъ галаз сад хьиз Ш.Эседуллаева, жаванрин арада Россиядин кIвен­кIвечивал патал акъажунрани 2-чка кьуна.

***

И йикъара Махачкъалада 15 йисал­ къведалди яшара авай жаванрин­ арада дзюдодай Дагъустандин кIвен­кIве­чивал патал кьиле фейи акъажунра­ чпин ери-бине Мегьарамдхуьруьн райондай тир жаванрини гъа­либвилер къазанмишна.

Кьилди къачуртIа, Марат Юлчиев (38 кг, тренер — Ариф Шагьгьуьсейнов, Советский хуьр) — 1, Ислам Ширинов (60 кг, тренер — Рамиз Ширинов, Бут-Къазмаяр) — 3, Ренат Муртузалиев (73 кг, тренер — Аб­дулла Букаров, Бут-Къазмаяр) — 1, Расул Тажибов (73 кг, тренер — Тельман Халидов, Мегьарамдхуьр) — 3-чкайриз лайихлу хьана.

Гила абуру Кеферпатан Осетия-Ала­ниядин меркез Владикавказда СКФО-дин кIвенкIвечивал патал мартдиз кьиле фидай нубатдин акъажунриз — гьазурвал аквада.

***

4 ва 5-февралдиз Москвадин ачух кIвен­­кIвечивал патал 18 йисал къведалди яшара авай жаванрин арада­ азаддаказ кьуршахар кьунай акъажу­нар кьиле фена. Ана шегьердин жуь­реба-жуьре  клубра устадвал хкажза­вай 200-далай виниз спортсменри гьасиррал чпин алакьунар къалурна.­ Вичин ери-бине Кьурагь райондин Кье­пIир­дилай тир, алай вахтунда Моск­ва­дин Некрасовка районда яшамиш­ жезвай чи ватанэгьли Гьажи-Мурат­ Аб­дулгьалимов (48 кг-дин залан­вал авайбу­рун арада), 4 бягьс­ни агал­кьунралди­ кьиле тухуналди, 1-чкадиз лайихлу­ хьана. Гила жаванди Россиядин кIвен­кIвечивал патал Орёл шегьерда кьиле фидай  акъажунриз гьазурвал аквада.

РикIел хкин: Гьажи-Мурат спортдал 6 йис тамам хьайидалай инихъ машгъул жезва. Исятда ада 10-классда хъсандиз кIелзава. Олимпиададин резервдин «Юность Москвы» спортшколада тренер Мегьамедрасул Качалован гъилик вичин вердишвилер ва устадвал хкажзавай ам азаддаказ кьуршахар кьунай школайра кIелзавай аялрин спартакиададин, Моск­вадин, областдин гъалибчи, ЦФО-дин кьве сеферда чемпион я. Ам грекринни римлуйрин жуьреда кьуршахар кьунални машгъул жезва, агалкьунарни ава.

Рагнеда  Рамалданова