СтIал Сулейманан районда мукьвал варцара сагъламвал мягькемардай «Куьредин гевгьер» комплекс кардик акатда. Ам районда машгьур ва гуьрчег пипIерикай сад тир Кьулан СтIалдал фидай рекье «Кпул ятарин» ва «Пуд булахдин» патарив гва. Комплексдин проект арадал гъайи ва генеральный директор Алдер Сиражидинович Алдерова къейдзавайвал, адан макьсад район «Сагъламвилин Меккадиз» элкъуьрун я.
ЦIийи комплекс кIвалахдив эгечIунин месэлаяр и йикъара Алдер Алдерова райондин кьил Саид Темирхановахъ галаз кьиле фейи гуьруьшдал веревирдна. Яргъал йисарин гьакъисагъ зегьметдай ва район вилик тухуник пай кутунай С. Темирханова А. Алдероваз Гьуьрметдин грамота гана. ЦIийи комплексди неинки райондин агьалийрин сагъламвал ва уьмуьрдин ери хъсанариз куьмекдайди, гьакI ада региондин здравоохранение вилик тухуникни кьетIен пай кутадайдахъ инанмишвал къалурна.
Районда чпиз халкьдин патай еке гьуьрмет авай Алдероврин хизандин макьсад агьалийриз къуллугъ авун, жемиятдиз жезмай кьван гзаф хийир гун я лагьайтIа, зун ягъалмиш туш. Вичин девирда Алдер духтурдин буба Сиражидин Къадировича, хуьруьн М. Калининан тIварунихъ галай зурба совхоздин директор хьайила, халкьдин дуланажагъ хъсан хьун патал еке зегьметар чIугурди, хуьре ва районда яшайишдин са кьадар дараматар эцигайди, са шумуд виш гектарда емишрин багълар кутурди рикIел хквезва. Райондин агьалийрин яшайишдин шартIар хъсанардай хейлин крарик кьил кутур адан тIвар чIехи несилдин векилри чими келимайралди рикIел хкизва. Алдер Сиражидинович «Кпул ятар» санаторий арадал гъайи кас яз гзафбуруз чида. Ада сагъарай агъзурралди азарлуйри духтурдиз сагърай лугьузва. «Кпул ятар» чешмедивай са акьван яргъа тушиз, районда «Пуд булах» тIвар акьалтнавай чкада, Алдер Сиражидинович реабилитациядин цIийи комплекс арадал гъунин къайгъуйрик квайди газетда чна муштулухни ганай.
— ЦIийи комплекс яшайишдин проект я. Ина кьулан тарцинни кIвачерин (опорно-двигательный) ва нервийрин къурулушдин азарар сагъарда. Ам алай чка къулайди, тIебиатдин жигьетдай кьетIенди тирвиляй реабилитациядин комплексдин серенжемри инсандиз сагъламвал мягькемардай еке мумкинвилер гуда. Иниз атайбурув гьар са дуьшуьшда кьетIенвилелди, лугьудайвал, «индивидуальный къайдада» эгечIда. Проектдин сергьятра аваз, ина Украинада кьиле физвай дяведин махсус серенжемдин иштиракчийриз ва абурун хизанризни чпин сагъламвал мягькемардай мумкинвал жеда. ЦIийи комплекс пешекарралди таъминаруниз ва абур гьазуруниз кьилин фикир гузва, — къейдзава Алдер Алдерова.
Идалайни гъейри, ина инновациядин цIийи къайдайрикайни менфят къачуда, инаг сагъламвал мягькемарун патал чкадинбур хьиз, яргъарайни туристар къведай чкадиз элкъведа. Азардикай сагъардалди адан вилик пад кьун регьят тирди пешекарри датIана лугьузва. Гьаниз килигна, цIийи комплексда и жигьетдай серенжемрикайни менфят къачуз жеда.
«Куьредин гевгьер» мукьвал варцара ачухун пландик ква. Чи уьлкведин жуьреба-жуьре регионра яшамиш жезвай агьалийри сагъламвал мягькемардай комплексдин кIвалахдиз екез итижзавайди аквазва.
Регина Семедова
