11-январдилай Дагъустанда Вирироссиядин мектебра кIел­за­вай аялрин олимпиададин (ВсоШ) регионрин дережадин пай башламишнава. РД-дин образованидин ва илимдин ми­нистерстводи хабар гузвайвал, ана республикадин школайрин 9-11-классра кIелзавай тахминан­ 4 агъзур­ аялди­ иштиракдайвал я. Ида­лайни­ гъейри, астрономиядай, физикадай ва математикадай олимпиадайра 7 ва 8-классра кIелзавай аялри иштиракда­.

Гьар жуьре тарсарай олимпиадаяр жуьреба-жуьре майданрал — абур Республикадин бажарагълу аялар винел акъудунин центради тайинарнава — кьиле фида.

ИкI, ДГПУ-дин технопаркдин майдандал региондин паюнин сад лагьай — искусстводин рекьяй (дуьньядин художественный культура) — олимпиада хьана. Гьуьжетунра  87 аялди иштиракна. Искусстводин рекьяй олимпиададин кьетIенвал ам тир хьи,  ам диктантдикай ва  аудиторияда кхьена тамамарун лазим тир ругуд тапшуругъдикай (яшариз килигна — гьар жуьрединбур) ибарат тир. Итижлу тапшуругъар тамамардайла, иштиракчийри чпин алакьунар ва чирвилер къалурна.

18 ва 20-январдин йикъара республикада — Дагъустандин гостехуниверситетдин майдандал — информатикадай олим­пиа­­да­дин кьве пай кьиле  фена. Ада республикадин саки вири районрай тир  тахминан 129 аялди иштиракна. Акъажунар саки вад сятда давам хьана.

ВсоШ-дин региондин паюникай вири делилар республикадин бажарагълу­ аялар­ винел акъудунин центрадин, РД-дин об­ра­­­зованидин ва илимдин министерстводин, гьакIни са жерге маса идарайрин сайт­рай жагъида. Олимпиада кьиле тухузвай­ вахтун­да арадал къвезвай суалар гуз жедай­ телефондин нумра кардик кутунва: +7 928 544-19-78.

Вирироссиядин школайра кIел­завай аялрин олимпиада Россиядин образованидин къурулушдик акатзавай ва бажарагълу аялрихъ галаз кIвалахун патал гьар йисуз кьиле тухузвай мярекат я. И къурулушдик умуми асул ва юкьван образованидин программайрик акатзавай  24 тарсунай тухузвай олимпиадаяр ква.

ВсоШ сентябрдилай майдалди тайинарнавай вахтунда кьиле тухузва ва кьуд паюникай ибарат я: школадин, муниципалитетдин, региондин ва эхиримжиди. Эхиримжи пай арзайрин бинедаллаз хкянавай Россиядин Федерациядин субъектра тешкилда. Нетижаяр кьадай и паюнин гъалибчийрив ва шабагьрин сагьибрив олимпиададин тарсунин рекьяй Россиядин Федерациядин гьи  университетдиз хьайитIани, имтигьанар вахкун тавуна (аттестатдин бинедаллаз), экечIдай  ихтияр гузвай диплом ва Россиядин Федерациядин Гьукуматдин патай махсус премия вахкузва.

Амина Муслимова