Алатай гьафтеда Дагъустандин гостехуниверситетда Россиядин студентрин югъ гегьеншдаказ къейдна. Мярекатда РД-дин Гьукуматдин Председатель Абдулмуслим Абдулмуслимова, адан заместитель Муслим Телякавова, РД-дин жегьилрин крарай министр Камил Саидова, образованидин ва илимдин министр Ягья Бучаева, Дагъустан Республикадин Халкьдин Собранидин образованидин ва илимдин рекьяй комитетдин председатель Елена Павлюченкоди, гьакIни жегьилрин са жерге тешкилатрин векилри, студентри иштиракна.
Суварин мярекат республикадин вузрин ва жегьилрин тешкилатрин агалкьунриз талукьарнавай выставкадилай башламиш хьана. ИкI, премьер-министрдин фикир Кавказдин инвестицийрин форумда ДГТУ-дин команда гъалиб хьайидалай кьулухъ робототехникадинни технический кибернетикадин рекьяй илимдинни ахтармишунрин ва тежрибадинни конструкторвилин Центральный институтди вуздиз гайи агророботри желбна. Студентри мугьманриз роботри тамамарзавай везифайрикай, абурулай алакьзавай крарикай ва ишлемишдай рекьерикай суьгьбетна.
Мярекат ДГТУ-дин конференц-залда давам хьана. Гьукуматдин председателди республикадин Кьил Сергей Меликован тIварцIелай Дагъустандин вузра кIелзавай студентриз Студентрин югъ (25-январь) тебрикна.
«Къенин гуьруьшдин иштиракчийрин арада международный ва Вирироссиядин конкурсра ва проектра гъалибвал къачур, грантриз лайихлу хьайи студентар, чирвилерин рекьин отличникар, ахтармишунардайбур, са гафуналди, бажарагълу ва гьевеслу тахминан 120 жегьил ава. Куь агалкьунри чи уьлкведа жегьилриз чпин бажарагъ ачухариз куьмекдай жуьреба-жуьре программаяр ва майданар гзаф авайдакай шагьидвалзава. Амма абуру жегьил касди, гьалтзавай четинвилерихъай кичIе тушиз, вичин макьсаддихъ агакьарун патал вири къуватар желб авурла, хъсан нетижайрал гъизва. За и залда авай вирибуруз чухсагъул лугьузва — гражданвилин жигьетдай куьне кьунвай чкадай, хайи макандин тIварцIел баркалла гъун патал куьне ийизвай крарай», — лагьана ада.
ДГТУ-дин ректор Назим Баламирзоева Россиядин Федерациядин Президент Владимир Путинан тапшуругъдалди тайинарай Россиядин студентвилин югъ къейд ийиз 20-йис тирдакай ва чи республикадини вири уьлкведихъ галаз санал и юкъуз кIелунин, илимдинни ахтармишунрин рекьера, жемиятдин кIвалахра тафаватлу хьайи студентар гьуьрметдивди тебрикзавайдакай лагьана.
Гуьруьш студентрин тешкилатрин кIвалахрин нетижаяр кьуналди акьалтIарна. Эхирдай республикадин са жерге студентриз, гьа жергедай яз ДГТУ-да кIелзавай Р. Багандовадиз, Ж. Кьасумовадиз, Д. Магьмудовадиз ва М. Умархановаз РД-дин Гьукуматдин патай шад гьалара шабагьар гана.
Амина Муслимова
