Ери хъсан жедайвал

Алай йисуз Дагъустанда здравоох­раненидин цIийи 45 объект эцигун­ пландик кутунва. Идакай РД-дин здраво­охраненидин министерстводин те­ле­г­рам-каналди хабар гузва.

Чешмеди раижзавай делилрай якъин­ жезвайвал, и объектрин чIехи пай ФАП-ар жеда ва абур эцигуналди хуьрерин чкайра медицинадин ерилу куьмекдив «гъил агакьун» артухарда.

Идалайни алава яз, телеграм-ка­нал­ди хабар гузвайвал, здравоохране­нидин 76 объектда капиталнидаказ туь­кIуьр хъувунин кIвалахар кьиле тухуда. Са жерге идарайри и серенжем вилив хуьз хейлин йисар я.

Агалун вилик акъвазнавач…

Каспийскда шегьердин автостан­ция­дин мулкунин гележегдиз талукь мес­эладин гьакъиндай къарар кьабулнава. Идакай «Дагъустандин экономика» телеграм-каналди кхьизва.

Кьилди къачуртIа, чешмеди, РД-дин транспортдин ва рекьерин майишатдин министерстводал асаслу яз, къейдзавайвал, автостанция агалунин месэла вилик акъвазнавач, ада гьа виликан къайдада кIвалахзава.

Министерстводи хабар гузвайвал, автотранспортдин карханаяр сад авунин серенжемдин сергьятра аваз, ведомстводи мэриядихъ галаз санал пассажирар тухудай улакьрин карханада дегишвилер тунва.

«Дагъустандин экономика» телег­рам-­каналдин къейдерай малум жезвайвал, 2024-йисан зулуз вичикай ихти­лат физвай автостанция бязи себеб­рал­ди агалунин планар авайдакай хабар акъатнай. ГьакIни «Каспийское АТП» карханадин пулдин такьатрихъ галаз алакъалу гьаларни пис тирди раижнай.

1 млрд манатдилай виниз

2024-йисан нетижайралди, мебелдин промышленностдин хиле продукциядин кьадар, къиметдин гьисабдалди,­ 1,1 миллиард манатдилай виниз акъатнава. Идакай «Дагъустандин экономика» телеграм-каналди кхьизва. Кьилди къачуртIа, РД-дин промышленностдин ва алишверишдин министрдин заместитель Гьажимурад Исрапилован гафарал асаслу яз, чешмеди­ къейдзавайвал, алатай йисан анжах 11 вацра продукциядин кьадар хкаж хьунин ериш 11 процентдилай алатнава.

Къейдзавайвал, ихтилат физвай и секторди вич республикадин экономикадик пай кутазвай, яшайишдин жигьетдай важиблувал авай хел хьиз къалурзава.

Дагъустанда акъудзавай мебель не­­инки са чкадин, гьакI дуьньядин базардани вичин чка кьаз жедайди я.

Такьатар артухарнава

РД-дин премьер-министр Абдулмус­лим Абдулмуслимован гафаралди, виликан йисара агьалийри, дарманар кьит я лугьуз, шикаятзавай. И кардихъ галаз алакъалу яз, мумкинвал хьанмазди­, и рекье ийизвай харжийриз пулдин та­кьатар артухарнава. Эгер дуьм-дуьз ла­гьайтIа, эхиримжи вад йисуз — 2 сефердилай артух. Идакай республикадин Гьу­куматдин телеграм-каналди хабар гузва.

Кьилди къачуртIа, А. Абдулмуслимова раижзавайвал, алай йисуз чпиз яшайишдин рекьяй тайин кьезилвилер талукь тир агьалияр дарманралди таъминаруниз 3 миллиард манатдилай гзаф пулдин такьатар фикирда кьунва. Адан гафаралди, и такьатар гьикьван метлебдив кьадайвал ишлемишдатIа, агьалийри сагъар хъувунин серенжемриз ийизвай харжийрин пар алудуниз гьикI таъсирдатIа чир хьун лазим я.

Гьа са вахтунда Дагъустандин премь­­­ер-министрди къейдзавайвал, пул­­дин такьатар артухарнаватIани, ши­ка­ятрин кьадар тIимил ваъ, гена артух хьанва, гьам, санлай къачурла, здраво­охраненидин къурулушда, гьамни, кьил­ди къачуртIа, дарманралди таъминарунин кIвалахдани. Мисал яз гъизвайвал, 2024-йисуз, 2023-йисав гекъи­гай­ла, дарманралди таъминарунин мес­­­эладин патахъай республикадин кьи­ле авайбурун адресдиз агьалийри 83 процентдин гзаф арзаяр авуна.

Месэлаяр авайдакай тайин сигналри хабар гузва, абуру кьетIи серенжемар кьабулун истемишзава.

А. Абдулмуслимова, гьял­на кIанза­вай месэлаяр фикирда кьуна, са жерге тапшуругъар ганва.

Гьазурайди — Муса  Агьмедов