Дербент шегьердин кьилин духтурханада махсус операциядин (кесарево сечение) куьмекдалди аял ханвай 31 йис хьанвай дишегьли рагьметдиз фена. Жуьреба-жуьре чешмейрин делилралди, ам Мегьарамдхуьруьн райондин ЦIийихуьряй тир.
«Лезги газетдиз» РД-дин здравоохраненидин министерстводин пресс-къуллугъди хабар гайивал, алай вахтунда махсус комиссияди арадал атанвай бедбахтвилин дуьшуьшдиз талукь ахтармишунар кьиле тухузва.
Дербентда аял хайидалай кьулухъ дишегьли кьенвайдакай малуматар интернетдин сайтриз 27-январдиз акъатна. Абурай якъин жезвайвал, дишегьли, аял хайидалай кьулухъ пуд югъ арадай фейила, кIвализ ахъай хъувуна. Амма кIвале адаз пис хьана ва дишегьли тади гьалда духтурханадиз агакьарна. Духтурривай адаз куьмекиз хьанач.
Рагьметдиз фенвайдан мукьва-кьилийри гьисабзавайвал, бедбахтвилин дуьшуьш арадал атунин тахсиркарар духтурар я. Абурун фикирдалди, эгер дишегьлидив медицинадин ерилу куьмек агакьарнайтIа, ихьтин кар арадал къведачир.
Ихтилат физвай агьвалатдикай РФ-дин Силисдин комитетдин председатель Александр Бастрыкинавни хабар агакьнава. Ада РФ-дин Силисдин комитетдин РД-да авай Управленидин кьил Дмитрий Беляеваз духтурханада дишегьли кьинин гьакъиндай ахтармишунар тухун ва вичиз абурун нетижайриз талукь доклад авун буйругънава.
«Лезги газетдин» редакциядин коллективди рагьметдиз фенвай дишегьлидин хизандиз, вири мукьва-кьилийриз, дериндай хажалат чIугунивди, башсагълугъвал гузва. Къанун-къайда хуьдай органрин векилри и дуьшуьшдиз гьахълудаказ къимет гудайдак умуд кутазва.
Чи мухбир
