Журналистар, корректорар, редакторар, хуьрерин мухбирар, ктабар акъудзавайбур — чун вири тупламишзавайди са макьсад я: халкьдин ацукьун-къарагъуниз, дуланажагъдиз, адетриз, культурадиз талукь делилар-хабарар кIватIун, ватанэгьлийрив агакьарун, басма авуна, тарихда тун.
И рекье тафаватлувал къалурайбур гьевесламишун патал и йикъара, Россиядин Печатдин йикъан сергьятра аваз, «Лезги газетдин» редакцияда, адет хьанвайвал, алатай йис патал малумарай конкурсрин нетижаяр кьуна ва гъалибчияр хкяна. Мубаракрай! Куь гьевесни илгьам ва къелемдин хцивал садрани зайиф тахьурай!
Конкурсрин гъалибчияр
Гьажибег ГЬАЖИБЕГОВАН премия — 10 000 манат.
«Лезги газетдин» сад лагьай редактор, журналист, драматург, критик, литературовед, лезги ва табасаран чIаларин алфавит туькIуьрай алим, Дагъустанда педагогикадин илимрин сад лагьай кандидат — Дагъустандин илимдин ва культурадин къизилдин фондуна гьатнавай яратмишунрин ирс тунвай Гьажибег Агьмедханович Гьажибегован (1902-1941) тIварунихъ галай и премия милли журналистика, публицистика, литература, илим вилик тухунин кардик лайихлу пай кутур ксариз гузва.
2024-йисан нетижайралди и премиядиз «Лезги газетдин» журналист, культурадин ва литературадин отделдин редактор, гьа са вахтунда са жерге ктабрин автор, писатель, публицист, литературадин критик ва таржумачи Гьажи Ильясован (тахаллус — А. Омаров) «СтIал Сулейманан алем» ктаб лайихлу хьанва.
Адан зегьметдин нетижа яз, шаирдин 155 йис тамам хьун къейд авур алатай йисуз, СтIал Сулейманан уьмуьрдикай ва яратмишунрикай акъатнавай хейлин шейэр — шаирдин вичин суьгьбетар, ада кхьей чарар, ихтилатар, гьакIни адакай очеркар, рикIел хкунар, ахтармишунар — санал кIватIна, гьазурнавай ва пуд ктабдикай ибарат кIватIал акъатна. И ктабда ачухнавай «СтIал Сулейманан алем» икьван чIавалди малум тирдалай «гегьеншди ва девлетлуди» я.
Мегьамед ГЬАЖИЕВАН премия — 5000 манат.
Лезги халкьдин машгьур лингвист, филологиядин илимрин доктор, кавказовед, РАН-дин ДНЦ-дин ИЯЛИ-дин бине кутур алимрикай сад, хайи лезги чIал ахтармишунин нетижа яз, чи халкь патал вичин метлеб садрани квахь тийидай ва вичиз тешпигь авачир урус чIаланни лезги чIалан таржумадинни баянрин (переводно-толковый) зурба словарь (35 агъзур гафуниз баянар ганва) гьазурай Мегьамед Мегьамедович Гьажиеван (1897-1958) тIварунихъ галай премия лезги чIал хуьник, чируник, ахтармишуник, ам девлетлу авуник пай кутурбуруз гузва.
Редколлегиядин къарардалди М. Гьажиеван премиядиз «Лезги газетдин» яшайишдин ва чарарин отделдин редактор Рагнеда Рамалданова лайихлу хьанва.
Къелемдин дустуни культурадин, искусстводин, халкьдин сеняткарвилерин, гьакIни яшайишдин месэлайриз талукь макъалаяр маналубур, таъсирлубур тирди газет кIелзавайбуру гузвай къиметдини тестикьарзава.
«СтIал СУЛЕЙМАНАН — 155 йис» премия — 8000 манат.
Винидихъ чна къейд авурвал, 2024-йис неинки лезги халкьдин, гьакIни Дагъустандин шииратдин нурлу гъетерикай сад, вичиз «XX асирдин Гомер» лагьай тIвар ганвай, Халкьдин шаир лагьай дережадиз хкаж хьайи СтIал Сулейманан 155 йисан юбилейдиз талукьарнавай. Идахъ галаз сад хьиз, «Лезги газетдин» редколлегиядини СтIал Сулейманан яратмишунриз, ада тунвай ирсиниз талукь цIийи конкурс малумарнай.
Редколлегиядин къарардалди, и конкурсдин премиядиз шаир, литературадин критик, таржумачи Мурад Саид лайихлу хьанва. Алатай йисуз чапдай акъатай «РикIелай тефидай аманат» («Немеркнущая память») ктабда авторди СтIал Сулейманаз уьлкведин ва дуьньядин шаирри гьар жуьре вахтара бахшнавай шиирар, адакай шаирри, писателри, машгьур ксари лагьай фикирар ктабрай, периодикадин изданийрай кIватIна, бязи шейэр вичи таржума авуна, чапдай акъуднава.
«Йисан месэла» конкурсдин пуд премия.
РФ-дин Президентдин къарардалди 2024-йис Россияда Хизандин йис яз малумарнай. «Лезги газетдин» «Йисан месэла» конкурсни хизандин месэлайриз талукьарнавай. Алатай йисуз конкурсдик дегишвални кухтунай — эгер икьван чIавалди пуд премия пуд жанрдиз талукь тиртIа, гила жанрайрин жигьетдай истемишунар арадай акъуднава. Гьа икI, гъалибчияр хкянава:
1-премиядиз — 3000 манат — газет кIелзавайбуруз хъсандиз таниш автор, Хасавюрт райондин Къурушрин хуьряй тир муаллим, мухбир Гьажи Къазиеван «Са тарцин бегьерар» (№15) макъала лайихлу яз гьисабна. Авторди баркаллу, зегьметкеш, Хасавюрт райондин Къурушрин хуьре авай Мамедоврин хизандикай суьгьбетзава.
2-премиядиз — 2000 манат — «Лезги газетдин» сиясатдин отделдин редактор, гьакIни лезги чIалал хейлин ктабрин автор, писатель Нариман Ибрагьимован «Уламрай экъечIдай къаст, къуват хьайила» (№42,43) макъала лайихлу хьана. Адан къелемдикай хкатай, Ватандиз къуллугъ авун сихилдин пеше яз хкянавай СтIал Сулейманан райондин Сальян хуьряй тир Эминоврин баркаллу хизандикай кхьей макъала кIелзавайбуру хушвилелди кьабулна.
3-премиядиз — 1000 манат — «Лезги газетдихъ» галаз датIана сих алакъаяр хуьзвай авторрикай сад, СтIал Сулейманан райондин «Куьредин хабарар» газетдин журналист, шаир Хазран Кьасумован «Гьуьрметдин къужахда» (№8) макъала лайихлу хьана. Зегьметдин ветеран, Эминхуьруьн агьали Исмаил Агьмедован чIехи ва гьуьрметлу хизандикай рахадайла, авторди кьилди къачур са хизандин бахтуникай санлай уьлкведин бахт арадал къвезвайди кьетIендаказ къейднава.
«ИкIни жеда кьван!» — 1000 манат.
И премиядалди чна Мегьарамдхуьруьн райондин Советский хуьруьн школадин тежрибалу муаллим, «Лезги газетдин» авторрикай сад Намедин Исмиханов къейдзава. Адан «Хуьруьн кимел» рубрикадик кваз чапдиз акъатай гъвечIи гьикаяяр, кьисаяр (№1, 26, 38, 47) кьезил, гьа са вахтунда сатирадин куьмекдалди кимивилер дуьздал акъуддайбур я.
«Гьевес кутадай премия» — 1000 манат.
Конкурсдин бинеда яратмишунин рекье зегьмет чIугвазвай авторрин активлувал къейд авун, абурун яратмишунрал фикир желбун ва идалди абур гьевесламишун ава. КьетIен шартIаралди сергьятламиш тавунвай и премия «Лезги газет» кIелзавайбуруз хъсандаказ таниш автор, Хив райондин ЦIийи Фиригърин хуьряй тир музыкадин муаллим, Дагъустандин музыкадин искусстводин месэлайрикай са жерге ктабрин автор Эдуард Ашурагъаеваз гун кьетIна.
«Йисан мухбир» — 3000 манат.
Редколлегиядин къарардалди ва 2024-йисан нетижайралди премиядиз «Лезги газетдин» хсуси корреспондент, композитор ва манидар, жуьреба-жуьре месэлайрай макъалайрин автор Къагьриман Ибрагьимов лайихлу хьанва.
Инал къейд ийин, алатай йисуз чна гьакIни «Хъсан шикил» ва «Литературадин конкурс» (пуд дережадин) малумарнай. И конкурсрин шартIариз жаваб гудай макъалаяр, гьайиф хьи, чав агакьнач. Гьаниз килигна, и номинацияр ичIиз амукьнава.
Жасмина Саидова
