Декабрдин эхирра Ахцегьрин 2-нумрадин юкьван мектебдин гьаятда Советрин Союздин Игит, лётчик Валентин Аллагьярович Эмирован цIийи гуьмбет ачухуниз талукьарнавай мярекат кьиле фена. Ана Ахцегь райондин кьилевайбуру, мектебдин коллективди, жемиятдин тешкилатрин векилри, мугьманри иштиракна.
— Гьуьрметлу юлдашар, къе и мектебдин ва санлай Ахцегьрин тарихда кьетIен вакъиа я: СССР-дин Игит, лётчик Валентин Эмироваз, Ватандин ЧIехи дяведа немсерин фашистрихъ галаз гьавадин женгина 27 йисан яшда аваз чавай къакъатай кьегьал хциз, вичин тIварунихъ галай мектебда гьайбатлу гуьмбет хкажнава. Адан чешнедалди чна акьалтзавай несилар ватанпересвилин руьгьдаллаз тербияламишда. Игитдин къаматдин ихьтин имарат эцигнавай чи зурба скульптор, академик, РФ-дин лайихлу художник Шариф Шагьмарданов пара кьадар сагърай! — лагьана райондин кьил Абдул-Керим Палчаева, мярекат ачухдайла.
Шадвилин мярекатдал мектебдин директор Замира Мегьамедалиева, РВК-дин комиссар Рафик Мегьамедов ва масабурни рахана. Аялри Валентин Эмирован уьмуьрдин ва женгинин рекьикай суьгьбетарна, шиирар кIелна.
Эхирдай А-К. Палчаева ва Ш. Шагьмарданова гуьмбетдилай, ам ачухунин лишан яз, перде алудна, мярекатдин иштиракчийри анал цуьквер эцигна, шикилар яна.
Дашдемир Шерифалиев
