27-декабрдиз Дербентда, СтIал Сулейманан тIварцIихъ галай паркуна, XX асирдин Гомеран цIийи гуьмбет ачухуниз талукьарнавай мярекат кьиле фена. Ана чкадин, СтIал Сулейманан райондин администрацийрин, жемиятдинни сиясатдин, яратмишдай интеллигенциядин векилри, алимри, медениятдин хилен къуллугъчийри, шегьерэгьлийри, жуьреба-жуьре районрайни шегьеррай атанвай мугьманри иштиракна.
Дербентдин администрациядин тIварцIихъай мярекатдал шегьердин мэрдин заместитель Видади Зейналов рахана. Ада Дагъустандин халкьдин шаир СтIал Сулейманан девлетлу ирсиникай суьгьбетна, гьакI гуьмбет арадал гъун ва мярекат хъсан дережада аваз тешкилун патал зегьмет чIугур виридаз Дербентдин администрациядин кьил Агьмед Къулиеван патай сагърай лагьана.
Гуьгъуьнлай, шадвилин межлисдин сергьятра аваз, СтIал Сулейманан райондин администрациядин кьилин сад лагьай заместитель Лацис Оружев, гуьмбетдин автор, РФ-дин лайихлу художник Шариф Шагьмарданов, Лезги театрдин директор Динара Эминова ва масабур рахана.
Эхирдай шадвилин гьалара гуьмбет ачухна ва мярекатдин иштиракчийри чIехи шаирдин къамат эбеди авунин ниятдалди хкажнавай гуьмбетдал цуьквер эцигна.
РикIел хкин, 2024-йис СтIал Сулейманан 155 йисан юбилейдинди тир. Дагъустандин Кьил Сергей Меликован Указдалди, и вакъиа республикада, адалай къецепатани вини дережада аваз къейдна.
Чи мухбир
