Дуьньяда кьиле фейи агьвалатарни вакъиаяр санлай фикирда кьуртIа, 2024-йис тарихдин ктабра гзаф веревирдер гьатдайди хьанва лугьунал шак гъиз жедач. Гьам хъсанвилихъ, гьамни инсафсузвилихъ галаз алакъалу гьерекатрив ацIай йис хьана. Дарвилихъ генгвални гала лугьудайвал, чна гьамиша экуь гележегдикай фикир авун, гьадак умуд кутун лазим я. Лугьудайвал, пессимист жедалди оптимист хьун хъсан я.
Милли меденият, эдебият патал ва, кьилди къачуртIа, чи халкь патал акьалтIзавай йис CтIал Сулейманан 155 йисан юбилейдалди лишанлу хьана. И йис РД-дин Кьил Сергей Меликова шаирдин юбилейдинди яз малумарунин нетижада кьиле фейи гегьенш мярекатри чи руьгь хкажна. «Лезги газетдин» редакцияди 2024-йис шаирдин юбилейдинди яз (1-нумрадилай) малумаруналди ачухна.
Шаирдин-камалэгьлидин юбилейдин йисуз Дагъустанда, Россиядин маса шегьерра, гьатта къецепатан уьлквейрани итижлу мярекатар, шииратдин межлисар кьиле фена. Махачкъалада адан тIварцIихъ тамам парк яна, анаг Сулейман Керимован куьмекдалди гуьрчегдиз туькIуьр хъувуна.
Сергей Меликован камаллу къарар себеб яз, гзафбуруз СтIал Сулейманан эсерар мадни кIел хъийидай, абурукай насигьатар хкуддай мумкинвал хьана. ГьикI хьи, къе шаирдин эсерар урус ва лезги чIаларал кIелиз кIандайбурувай вижевай ктабар гъилик ийиз жеда. Тажубвал тийин, авайвал лагьайтIа, эхиримжи йисара СтIал Сулейманан шииррин ктабар саки жагъизмачир. Адан ктабрин суракьда авай гзафбуру «Лезги газетдин» редакциядиз зенгер ийизвай. Неинки шиирар, гьакI шаирдин уьмуьрдикайни яратмишунрикай ибарат макъалайрин кIватIаларни цIи чапдай акъатна. Вири и крар юбилей себеб яз хьана. Лугьун хьи, шаирдин яратмишунриз нубатдин сеферда нефес хгана.
Сулейман Керимован куьмекдалди уьлкведин гзаф кьадар шегьерра СтIал Сулейманан юбилейдиз талукь баннерар тайинарна. Течизвайбуруз чир хьана, чизвайбурун рикIел хкана. Гзаф камалэгьлийрин фикирдалди, халисан шаирриз эбедивал хас я. Амма ихьтин камаллу ксарикай малуматар, абурун яратмишунар несилрилай несилрал агакьарун гьар аямдин чIехи несилрин эвелимжи буржийрикай я. Вучиз лагьайтIа, эдебият галачир уьмуьр наажебди жеда. Ам, эдебият, инсанриз фу хьиз, яд хьиз герек я. Гьана вири ава, гьанай вири жагъида: уьмуьрдин тежриба, акьул, къанажагъ, лезет, чирвал, тарих, тербия, ватанпересвал, меденият, руьгьдин секинвал…
СтIал Сулейманан камаллувал, викIегьвал, аслу туширвал эбеди чешне яз амукьда. Ада вич акIажариз тежедай, буйругъар гуналди тайин шиирар кхьин тийидай кас тирди успатна. «За шиирар жуван рикIин эмирдалди теснифзава. МасакIа завай са цIарни теснифиз жедач» лагьанай ада.
С.Сулейманан эсерар камалдин энциклопедиядив гекъигиз жеда. Крар — яваш, гафар — еке тир ксар акур, сафуналди яд гъиз тежедайди ва гъафил юлдашриз ахварай аватун хъсан тирди рикIел хкай, еке санкьу кьуна сиве кьилди вичиз жакьваз кIанзавайбуруз туьгьмет авур, намерддин мецихъ агъайтIа, хийирдай къецихъ акъудда лагьай, беймирветриз тежер кардал зегьмет чIугун тавуниз эвер гайи, масмар гатаз тийижиз рикIиз шуьшка кIандайбур, кесибар хурук кутаз, дамах жедай бязибур айгьамдалди гатай, гьи инсан ятIа ариф, гьадан тариф авур, чарадалай нубатсуз фитне авуна виже текъведайдакай тербиядин тарсар гайи СтIал Сулейман я ам. Яргъияр ийидач — вири ава адан яратмишунра.
Къейд ийин хьи, 2024-йисан муддатда газетдиз адаз талукь материалар, рикIел хкунар, цIийи фикирар, веревирдер, таржумаяр акьван акъатна хьи, абур вири агудайтIа, тамам кIватIал арадал къведа. Са гафуналди, халкьдин баркаллу векилдин юбилей лайихлудаказ кьиле тухвана. Гьатта вилив техвей хьтин вакъиаяр, мярекатар кьиле фена. Аферин ихьтин крарик кьил кутазвай, анра иштиракзавай, алакьдай куьмекар гузвай вири ватанэгьлийриз!
К. КIелетви
