РикIел хуьнин лишан яз
21-декабрдиз Мегьарамдхуьре, СССР-дин Игит Абас Исрафилован тIварунихъ галай 1-нумрадин ДЮСШ-да, 2009-2010-йисара дидедиз хьайи жаванрин арада дзюдодай Дагъустандин ачух кIвенкIвечивал ва райондин кьил Ф. Агьмедован призар патал акъажунар кьиле фена. 1999-йисуз Дагъустандиз гьахьай международный бандитрин дестеяр терг авуниз бахшнавай ам ачухуниз талукьарнавай шад мярекатда Ахцегь райондин кьил Абдул-Керим Палчаева, къушарин «Гюней» фабрикадин директор Осман Абдулкеримова, Кьиблепатан Дагъустандин десантникрин союздин ветеранри ва масабуру иштиракна.
«Тамам 25 йис идалай вилик кьиле фейи вакъиайри халкьдин викIегьвал ва садавайни муьтIуьгъариз тахьун чи садвиле авайди нубатдин сеферда субутна. Уьлкведин халкьарин садвал чи абадвилин ва уьлкве вилик финин кьилин шартIарикай сад яз амукьзава. Спортди чи садвал къалурзава, къенин мярекатда республикадин жуьреба-жуьре шегьеррайни районрай кIватI хьанвай спортсменри и кар мадни субутзава», — къейдна райондин кьили акъажунар ачухуниз талукьарнавай шад мярекатдал.
Ачух кIвенкIвечивилин сергьятра аваз, Ф. Агьмедова спортда агалкьунар къазанмишунай ва райондин жегьилар сагълам уьмуьр тухунал желб авунай дзюдодай Россиядин спортдин лайихлу мастер Ренат Саидоваз «Мегьарамдхуьруьн райондин гьуьрметлу агьали» лагьай лишан гана. ГьакI футболдин «Леки» командани шад гьалара къаршиламишна.
***
«Нубатдин сеферда чна, СВО-дин игит, Жуьрэтлувилин ордендин кавалер, гвардиядин лейтенант Алаудин Бабаеван экуь къаматдиз бахшна, республикадин дережадин турнир кьиле тухузва. Хъсан офицер хьиз, ам агалкьунар къазанмишнавай спортсменни тир. Спортдин рекье сифтегьан камар ада и ДЮСШ-да къачуна. Кьве йис идалай вилик чна и школа игитдин тIварунихъ ягъунин къарар кьабулнай. Умудлу я, акьалтзавай несилдиз Алаудин ва Ватан патал чанар къурбанд авур амай чи кьегьаларни жуьрэтлувилин чешнедиз элкъведа. Чи райондай 500-лай виниз агьалийри дяведин махсус серенжемда уьлкведин итижар хуьзва. Абуру гъалибвал къазанмишун, сагъ-саламатдиз чпин хизанрин патав хтун чи мурад я. Чи гъвечIи спортсменар, гьа ихьтин ксарилай чешне къачуналди, хъсандиз кIелун ва спортдал машгъул хьун герек я. Къуй гележегдани чи спортсменрихъ агалкьунар ва чи кьилел михьи экуь цав хьурай!», — ихьтин чими келимайралди ачухна СтIал Сулейманан райондин кьил Саид Темирханова Кьасумхуьрел кардик квай 1-нумрадин ДЮСШ-да волейболдай тухвай турнир.
Райадминистрацияди ва спортшколадин чкадин агрокарханайринни игитдин багърийрин спонсорвилин куьмекни галаз тешкилай и турнирди республикадин са шумуд шегьердайни районрай тир волейболистар кIватIна. Къизгъин къугъунрин нетижада Каспийскдин команда — 1, Курхуьруьн — 2 ва Дербентдин 3-чкайриз лайихлу хьана.
***
И йикъара Кьурагьрин ДЮСШ-да, райондин 7 хуьруьн школайра кIелзавай 90-далай виниз аялрин иштираквал аваз, СССР-дин спортдин мастер, дзюдодай Дагъустандин са шумудра чемпион, мастервилин турниррин гъалибчи Неби Камалдинован экуь къаматдиз бахшна, азаддаказ кьуршахар кьунай 3-турнир кьиле тухвана. Турнирдин кьилин спонсор Н. Камалдинован стха Керим Мегьамедович тир.
Гьасиррал къизгъиндаказ кьиле фейи бягьсерин нетижада заланвилин 11 категориядай гъалибчияр майдандиз акъатна. Райадминистрациядин ФС ва ДМ-дин отделдин начальник Рамиз Рамазанова абурув пишкешар вахкана. Турнирда тафаватлу хьайи спортсменар ва судьяяр кьилдин пишкешризни лайихлу хьана. ИкI, районда спорт вилик тухуник ва акьалтзавай несил тербияламишуник лайихлу пай кутунай ДЮСШ-дин тренер Юсуф Мисриевав Кьурагь райондин кьил З. Азизован патай Чухсагъулдин чар вахкана, Керим Камалдинова адаз пулдин пишкеш гана.
Рагнеда Рамалданова
