Алава такьатар

Са жерге регионра ЖКХ-дин ва энергетикадин карханаяр вилик­ тухун патал уьлкведин гьукуматди пулдин алава такьатар чара ийида. Идакай РФ-дин Гьукуматдин сайтда хабар гузва.

Кьилди къачуртIа, чешмеди кхьизвайвал, Да­гъустанда, Ингушетияда ва Кеферпатан Осетияда ЖКХ-дин ва энергетикадин карханаяр дурумлудаказ вилик тухунин программа уьмуьрдиз кечирмишун патал 947,8 миллион манатдилай виниз алава такьатар ракъурда. Идан гьакъиндай буйругъдал къул чIугунва. Хабар гузвайвал, и регионра проект ахтармишунин дережада аваз кьилиз акъудзава.

Такьатар гьукуматдин игьтият патал хуьзвай фондунай чара авунва. Чешмеди раижзавай делилрай ашкара жезвайвал, и пулдин такьатрин куьмекдалди ЖКХ-дин ва энергетикадин карханаяр дурумлудаказ вилик тухудай регионрин программайра къалурнавай мярекатар уьмуьрдиз кечирмишда.

Кьилди къачуртIа, пулунин такьатар агъа­дихъ галай мярекатар кьиле тухуниз харжда­: гьар са субъектда вичин бинедал региондин ЖКХ-дин эменнидин ком­плекс­ди санал кIва­лах­дай сад тир оператор арадал гъуниз; и хилез хъсан пешекарар желб авуниз; экономикадин жигьетдай бине авай тарифар тайинаруниз.

Саки кьве вацра

Уьлкведин 7 миллиондилай виниз агьалийри «Госуслуги.Дом» приложенидикай мен­фят къачуз эгечIнава. Идакай, вице-премь­ер Марат Хуснуллинан гафарал асаслу яз, РФ-дин Гьукуматдин сайтда хабар гузва.

Къейдзавайвал, вичикай ихтилат физвай­ и приложениди ГИС ЖКХ-дин бинедаллаз кIва­­лахзава ва ЖКХ-дин хиле ацалтзавай мес­элаяр гьялунин кIвалах регьятарзава, и кардихъ галаз алакъалу къуллугъар са чкада кIватIуналди.

Адан куьмекдалди квартирайрин иесийривай чпин кIвал, мобильный такьатдикай менфят­ къачуналди, идара ийиз жеда. Мисал яз, кIвалин сагьибдивай и приложенидай­ чпин учет тухудай­ такьатрин (приборы­ уче­та) рекъемар агакьариз, яшайишдин­ кIва­линни коммунальный къул­лугърай­ гьа­къи гуз, арзаяр ракъуриз жеда. ГьакI­ни­ адан куьмекдал­ди ие­сий­рин собранийра сесер гуз, капитальный­ ремонтдин план ахтармишиз, идара ийиз­вай тешкилатдин (управляющая организация) гьахъ-гьисабрал гуьзчивал тухузни жеда.

Хабар гузвайвал, «Госуслуги.Дом» при­ло­жение вахт-вахтунда цIийи  ва икьван чIа­валди авачир къуллугъар­ни пайда жезва.

Алай йисан октябрдин вацра РФ-дин эцигунрин ва ЖКХ-дин министерстводин сайтда уьлкведин 6 миллиондилай виниз агьалийри «Госуслуги.Дом» приложенидикай менфят къачуз эгечIнавайдакай раижнай.

Идарадин сайтда кхьизвайвал, «Госуслу­ги.Дом» агъадихъ галай «при­ложенийрин туьк­венрай» жуван­ теле­фондиз акъудиз жеда: RuStore, AppStore ва мсб.

Йисан сифтедилай инихъ

Алай йисан сифтедилай инихъ уьлкведин­ здравоохраненидин министерстводи саки 480 дарман регистрация авунва, абурукай 70 процент чкадинбур я. Идакай, РФ-дин здравоохраненидин министр Михаил Мурашкодин гафарал асаслу яз, ведомстводин телеграм-каналди хабар гузва.

Министрдин гафаралди, алай вахтунда­ уьлкведа федеральный лабораторийрин 13 комплексди кIвалахзава. Абуру, агьалийрин гъиле къекъвезвай (гражданский оборот) дарманрин такьатрин еридал гуьзчивал тухузва. Мурашкоди гьакIни къейдзавайвал, и лабораторияр «алай девирдин жуьредив кьадай» (современный) такьатралди тадаракламишнава.

Гьазурайди — Муса  Агьмедов